पुणे : पुण्यातील बांधकाम व्यावसायिक खलील शेख यांच्या आत्महत्या प्रकरणात आरोपी असलेले माजी आमदार व शिवसेना नेते रवींद्र धंगेकर यांनी शुक्रवारी पत्रकार परिषदेत गंभीर इशारा दिला. या प्रकरणात आपल्याला गुन्हेगार ठरवण्यात आले, तर पोलीस उपायुक्त मिलिंद मोहिते यांच्या घराबाहेर आत्महत्या करेन, असे त्यांनी म्हटले. या प्रकरणाशी आपला किंवा पत्नी प्रतिभा धंगेकर यांचा कोणताही संबंध नसल्याचा दावाही त्यांनी केला.
गुलटेकडी येथील बांधकाम व्यावसायिक खलील शेख यांनी आत्महत्येपूर्वी व्हिडिओ तयार करून आर्थिक अडचणींसह काही व्यक्तींवर गंभीर आरोप केले होते. शेख यांच्या पत्नीच्या तक्रारीवरून स्वारगेट पोलिसांनी रवींद्र धंगेकर, प्रतिभा धंगेकर यांच्यासह इतरांविरुद्ध गुन्हा दाखल केला आहे. या प्रकरणात अतिरिक्त सत्र न्यायालयाने धंगेकर दाम्पत्याला अंतरिम अटकपूर्व जामीन मंजूर केला आहे.
जामीन मिळाल्यानंतर धंगेकर यांनी वकील विजयसिंह ठोंबरे यांच्या कार्यालयात पत्रकार परिषद घेऊन आपली बाजू मांडली. संबंधित जागेवर पुनर्विकासासाठी ‘उत्कर्ष असोसिएट्स’ची स्थापना करण्यात आली होती. प्रकल्पाला रेरा मान्यता आणि बँकेचे कर्ज मिळाले होते. मात्र, जागा वक्फ बोर्डाशी संबंधित असल्याची नोटीस मिळाल्यानंतर काम थांबले.
