मुंबई महानगरपालिकेने (BMC) पाइपलाइन क्रॉस-कनेक्शनचे काम हाती घेतल्याने पुढील आठवड्यात मुंबईत पाणीपुरवठा बंद राहणार आहे. अमर महल भूमिगत बोगद्याच्या संबंधित महत्त्वाचे काम असल्याने पाणीपुरवठा खंडित केला जाईल. याच पार्श्वभूमीवर, बीएमसीने नागरिकांना पाण्याची काटकसर करण्याचे आवाहन केले आहे.
३० तास पाणीपुरवठा बंद
पाइपलाइनच्या कामामुळे शहरातील मोठ्या भागात ३० तास पाणीपुरवठा पूर्णत: बंद किंवा कमी दाबाने होणार आहे. ही जलवाहिनी बंदी सोमवार, १ डिसेंबर रोजी सकाळी १० वाजता सुरू होऊन मंगळवार, २ डिसेंबर रोजी दुपारी ४ वाजेपर्यंत चालणार आहे. घाटकोपर पूर्व येथील छेडा नगर जंक्शनवर २,५०० मिमी व्यासाच्या नव्या जलवाहिनीला ३,००० मिमीच्या विद्यमान मुख्य जलवाहिनीशी जोडण्याचे काम या काळात केले जाईल. अमर महल टनेलमधील शाफ्ट क्रमांक १ आणि २ मुख्य जलवाहिनी जाळ्याशी जोडण्यासाठी हे काम अत्यंत आवश्यक असल्याचे बीएमसीने स्पष्ट केले आहे.
अकरा प्रशासकीय वॉर्डमध्ये पाणी कपात
दक्षिण आणि मध्य मुंबईतील ए, बी, सी, ई, एफ दक्षिण आणि एफ उत्तर वॉर्ड तसेच पूर्व उपनगरांतील एल, एम पूर्व, एम पश्चिम, एस आणि एन वॉर्डला या पाणीकपातीचा फटका बसणार आहे. भायखळा, मुंबई सेंट्रल, नागपाडा, डोंगरी, मस्जिद बंदर, वरळी, परळ, सायन, वडाळा आणि शिवडी येथे राहणाऱ्या नागरिकांनी पुरेसा पाणी साठा करून ठेवण्याचे आवाहन बीएमसीने केले आहे.
पूर्व उपनगरांनाही फटका
पूर्व उपनगरांतील कुर्ला, चेंबूर, चूनाभट्टी, गोवंडी, देवनार, घाटकोपर, विक्रोळी आणि भांडुप येथील काही भागातही पाणीपुरवठा बंद किंवा कमी दाबाने होणार आहे.
पाणी जपून वापरा- बीएमसीचे आवाहन
नागरिकांनी पाणीपुरवठा बंद राहिलेल्या तासांमध्ये पाणी वापरात काटकसर करावी, असे आवाहन बीएमसीने केले आहे. "पाईपलाइनचे नवे कनेक्शन शहराच्या दीर्घकालीन जलपुरवठा व्यवस्थेला अधिक सक्षम करण्यासाठी अत्यावश्यक असल्याने हे काम पुढे ढकलणे शक्य नाही," असे अधिकाऱ्यांनी स्पष्ट केले.
नागरिकांनी संबंधित वॉर्डनिहाय प्रसिद्धपत्रक तपासावे आणि दोन दिवस चालणाऱ्या देखभाल कामासाठी योग्य तयारी करावी, असेही आवाहन बीएमसीने केले आहे.
