अमित श्रीवास्तव/मुंबई
मुंबई महापालिकेने देवनार आणि महालक्ष्मी येथे लहान प्राणी आणि पक्ष्यांसाठी नवीन स्मशानभूमी सुविधा उभारली आहे. यामुळे मुंबईतील नागरिकांना आपल्या पाळीव प्राण्यांच्या अंत्यसंस्कारासाठी एक पर्यावरणपूरक पर्याय उपलब्ध झाला आहे.
मुंबई उच्च न्यायालयाच्या निर्देशानुसार महापालिकेच्या पशुवैद्यकीय आरोग्य विभागाने ही सुविधा सुरू केली असून १ एप्रिल २०२६ पासून ती कार्यान्वित झाली आहे.
अतिरिक्त महापालिका आयुक्त (शहर) डॉ. अश्विनी जोशी यांनी दिलेल्या माहितीनुसार, या नवीन सोयीमुळे मुंबई शहर तसेच पूर्व आणि पश्चिम उपनगरातील रहिवाशांना हक्काची सुविधा मिळाली आहे. मालाड येथे २०२३ पासून अशा प्रकारची सुविधा आधीच कार्यरत आहे. देवनार येथील केंद्र पीएनजी इंधनावर चालणारे असून तेथे ५०० किलो वजनापर्यंतच्या प्राण्यांवर अंत्यसंस्कार करता येतील. महालक्ष्मी येथील केंद्र विद्युत असून ते ५० किलोपर्यंतच्या प्राण्यांसाठी डिझाइन केले आहे. ही दोन्ही केंद्रे ‘टाटा ट्रस्ट’ आणि महापालिका यांच्या संयुक्त विद्यमाने चालवल्या जाणाऱ्या प्राणी रुग्णालयाच्या परिसरात आहेत.
या उपक्रमामुळे मुंबईतील सार्वजनिक आरोग्याचा दर्जा सुधारेल आणि पाळीव प्राणी मालकांना मोठा दिलासा मिळेल, असा विश्वास पालिकेच्या अधिकाऱ्यांनी व्यक्त केला आहे.
ऑनलाइन नोंदणी आवश्यक
नागरिकांना या सुविधेसाठी महापालिकेच्या पशुवैद्यकीय आरोग्य विभागाच्या संकेतस्थळावर ऑनलाइन नोंदणी करता येईल किंवा ७५६४९७६६४९ या हेल्पलाइन क्रमांकावर संपर्क साधता येईल.
