मुंबई : थकबाकीदारांची मालमत्ता जप्त करून त्याचा लिलाव करण्याचा निर्णय मुंबई महापालिकेने घेतला आहे. महालक्ष्मी, लोअर परळ आणि मालाड येथील कंपन्यांनी थकीत रक्कम सात दिवसांत न भरल्यास जप्त मालमत्तांचा लिलाव करण्यात येईल, असा इशारा मुंबई महापालिकेच्या कर निर्धारण व संकलन विभागाने दिला आहे.
मुंबई महानगरपालिका अधिनियम, १८८८ च्या कलम २०६ (२) अंतर्गत ही कारवाई करण्यात आली आहे. महापालिकेने जाहीर केलेल्या यादीत लोअर परळ, महालक्ष्मी आणि मालाड (पूर्व) येथील व्यावसायिक, निवासी आणि मिश्र वापराच्या मालमत्तांचा समावेश आहे. यामध्ये सर्वाधिक थकबाकी महालक्ष्मी येथील रघुवंशी मिल्स लिमिटेड या मालमत्तेवर असून सुमारे ३७.३२ कोटी रुपयांची देय रक्कम आहे. त्यापैकी २७.७१ कोटी रुपये मालमत्ता कर तर ९.६० कोटी रुपये दंडाचा समावेश आहे.
लोअर परळ येथील अंबिका सिल्क मिल्स कंपनी लिमिटेड या मालमत्तेवर सुमारे ११.२२ कोटी रुपयांची थकबाकी आहे. यामध्ये ६.०७ कोटी रुपये कर आणि ५.१४ कोटी रुपये दंडाचा समावेश आहे.
मालाडच्या वाडार एसआरए सहकारी गृहनिर्माण संस्थेशी संबंधित दोन मालमत्तांवर अनुक्रमे १.०८ कोटी रुपये आणि १.२८ कोटी रुपयांची थकबाकी आहे.
