सायबर गुन्ह्यांचे प्रमाण झपाट्याने वाढत असताना मालाडमध्ये एक धक्कादायक घटना घडली आहे. ६५ वर्षीय व्यक्तीच्या मोबाईलमध्ये बनावट RTO चलन अॅप इन्स्टॉल करून स्कॅमरने लाखोंचा गंडा घातला. या प्रकरणी पोलिसांनी आयटी अ‍ॅक्टनुसार गुन्हा दाखल केला आहे.
मालाड येथील ज्येष्ठ नागरिकाची बनावट RTO चलन अॅपद्वारे तब्बल ७.६० लाखांची ऑनलाईन फसवणूक झाली. या अॅपच्या माध्यमातून स्कॅमरने त्यांचा मोबाईल ताब्यात घेतल्याचा संशय व्यक्त केला जात आहे. गुरुवारी (दि.२७) मालाड पोलिसांनी अज्ञात व्यक्तीविरोधात फसवणूक आणि आयटी अ‍ॅक्टअंतर्गत गुन्हा दाखल केला आहे.
जुनी कार खरेदी केली आणि...
FIR मधील माहितीनुसार, कमलेश चौक्शी हे मालाड पश्चिममध्ये राहणारे निवृत्त नागरिक आहेत. त्यांनी जुनी कार खरेदी केली होती. पुढील प्रक्रियेसाठी त्यांनी RTO Challan अॅप डाउनलोड केले. त्यानंतर गाडी विकणाऱ्या व्यक्तीने चौक्शी यांना २,००० रुपयांचे RTO चलन या अॅपद्वारे भरण्यास सांगितले. त्यांनी पेमेंट केले आणि दुसऱ्याच दिवशी ती रक्कम चौक्शी यांच्या खात्यात पुन्हा जमा झाली. पोलिसांच्या मते, "हा विश्वास संपादन करण्याचा डाव होता."
धडकी भरवणारे बँक अलर्ट
२६ नोव्हेंबरला अचानक चौक्शी यांच्या मोबाईलवर एचडीएफसी (HDFC) बँकेचे सतत अलर्ट येऊ लागले. पहिल्या अलर्टमध्ये ४.९० लाख रुपये नॅशनल इलेक्ट्रॉनिक फंड ट्रान्सफर (NEFT) मार्फत डेबिट झाल्याचे दिसले. तो मेसेज वाचत असतानाच अजून दोन अलर्ट आले. एकामध्ये १ लाख आणि दुसऱ्यात १.७० लाख रुपये कमी झाल्याचे समजले.
रिअल-टाइममध्ये आपल्या खात्यातून पैसे जात असल्याचे लक्षात येताच चौक्शी यांनी तातडीने ही माहिती त्यांच्या मुलाला दिली. त्यानंतर मुलाने तात्काळ बँकेत जाऊन अनधिकृत व्यवहारांची नोंद करून खाते गोठवण्याची विनंती केली.
RTO Challan अॅपमधून फोन हॅक
तक्रार नोंदवल्यानंतर मालाड पोलिसांनी अज्ञात व्यक्तीविरोधात गुन्हा दाखल केला आहे. प्राथमिक तपासात, बनावट RTO Challan अॅप हेच फसवणुकीचे माध्यम असल्याचे समोर आले आहे. या अॅपच्या मदतीने स्कॅमरने पीडित व्यक्तीच्या मोबाईलमध्ये प्रवेश मिळवून आर्थिक व्यवहार केल्याचा संशय आहे.
