मुंबई : अजून गणेशोत्सवाला महिन्याहून अधिक काळ बाकी असला, तरी मुंबईत बाप्पाच्या आगमनाची चाहूल लागली आहे. ढोल-ताशांचा गजर, भगव्या पताका, "गणपती बाप्पा मोरया"चा जयघोष आणि उत्साही गणेशभक्त... या वातावरणात मुंबईतील अनेक सार्वजनिक गणेश मंडळांनी रविवारी (दि. २) आपल्या लाडक्या बाप्पाच्या आगमन सोहळ्याची सुरुवात केली. यंदा १४ सप्टेंबरला गणेश चतुर्थी साजरी होणार असून, त्याआधीच लालबाग-परळ परिसरासह अनेक भाग भक्तिमय वातावरणात रंगून गेले आहेत.
लालबाग-परळमध्ये बाप्पाच्या आगमनाचा जल्लोष
मुंबईतील प्रसिद्ध गणेश मंडळांमध्ये बाप्पाच्या मूर्तींचे पारंपरिक पद्धतीने स्वागत करण्यात आले. ढोल-ताशांच्या गजरात, फुलांची उधळण करत आणि जयघोषात मूर्ती मंडळांकडे नेण्यात आल्या. प्रत्येक वर्षाप्रमाणे यंदाही आगमन सोहळ्यासाठी मोठ्या संख्येने गणेशभक्त उपस्थित होते.
पाहा व्हिडिओ
विशेष म्हणजे, अनेक मंडळांनी आगमन मिरवणुकीत पारंपरिक वाद्यांसह सांस्कृतिक कार्यक्रमांचे आयोजन केले होते. त्यामुळे लालबाग-परेल परिसरात सणाची रंगत आतापासूनच अनुभवायला मिळत आहे.
मुंबईत तयार झालेल्या मूर्तींची गुजरातमध्येही मागणी
मुंबईत तयार होणाऱ्या गणेशमूर्तींची लोकप्रियता राज्याच्या सीमाही ओलांडत आहे. यंदाही मुंबईत साकारलेल्या अनेक आकर्षक गणेशमूर्ती गुजरातमधील विविध मंडळांसाठी रवाना करण्यात आल्या आहेत. सुरतसह अनेक शहरांमध्ये मुंबईत तयार झालेल्या मूर्तींचे जल्लोषात स्वागत करण्यात आले. यामुळे महाराष्ट्राबाहेरही मुंबईच्या गणेशोत्सव परंपरेची लोकप्रियता दिवसेंदिवस वाढत असल्याचे चित्र दिसत आहे.
पारंपरिक पद्धतीनेही झाले आगमन
आधुनिक मिरवणुकांसोबतच काही मंडळांनी पारंपरिक पद्धतीने बैलगाडीतून बाप्पाचे आगमन करत जुनी परंपरा जपली.
ग्रामीण संस्कृतीची झलक दाखवणाऱ्या या आगमन सोहळ्यांनी उपस्थितांचे विशेष लक्ष वेधून घेतले.
आता प्रत्येक आठवड्यात रंगणार आगमन सोहळे
गणेशोत्सव जवळ येत असल्याने ऑगस्टभर मुंबईतील विविध मंडळांमध्ये आगमन सोहळे पार पडणार आहेत. प्रत्येक विकेंडला वेगवेगळ्या मंडळांमध्ये बाप्पाचे स्वागत होणार असल्याने गणेशभक्तांमध्ये उत्साहाचे वातावरण निर्माण झाले आहे.
यंदाही गणेशोत्सव मोठ्या जल्लोषात साजरा करण्यासाठी मंडळांनी तयारीला सुरुवात केली असून, मुंबईत पुन्हा एकदा "गणपती बाप्पा मोरया"चा जयघोष घुमू लागला आहे.
