पूनम अप्रज/ मुंबई
वैद्यकीय "मंत्रालयीन शिक्षणातील कोटा" तून एमबीबीएस सीट मिळवून देण्याचे आमिष दाखवून मुंबईतील रहिवाशाची १४.४० लाख रुपयांची फसवणूक करणाऱ्या दोघांना आजाद मैदान पोलिसांनी अटक केली आहे. पोलिसांनी संपूर्ण रक्कम परत मिळवून तक्रारदारास १००% नुकसानभरपाई मिळवून दिली आहे.
अधिकाऱ्यांच्या माहितीनुसार, या प्रकरणाची नोंद आजाद मैदान पोलिस ठाण्यात भारतीय दंड संहिता कलम ४०६, ४२०, ३४ अंतर्गत करण्यात आली आहे. तक्रारदार हा धोबी तलाव, मुंबई येथील ४३ वर्षीय रहिवासी असून त्याने आरोप केला की, २६ मे २०२२ ते २९ सप्टेंबर २०२३ या कालावधीत आरोपींनी त्याच्या मुलीला वैद्यकीय महाविद्यालयात प्रवेश मिळवून देण्याचे आश्वासन देत एकूण १४,४०,००७ रुपये उकळले.
अटक करण्यात आलेल्या आरोपींची ओळख कृष्ण मोहन विष्णुदत्त शर्मा (४६, रा. आग्रा, दिल्ली) आणि एनुल झेनुल हसन (३२, रा. धीरज नगर, टांडा तहसील, रामपूर, उत्तर प्रदेश) अशी झाली आहे, असे पोलीस अधिकाऱ्यांनी सांगितले.
