सततच्या बिघाडामुळे वारंवार चर्चेत राहिलेली मुंबई मोनोरेल आता नव्या रुपात आणि नव्या दमाने प्रवाशांसमोर येण्यासाठी सज्ज झाली आहे. महा मुंबई मेट्रो ऑपरेशन कॉर्पोरेशन लिमिटेड (MMMOCL) ने जाहीर केल्यानुसार, पुढील काही महिन्यांत मोनोरेलचा प्रवास अधिक सुरक्षित, स्मार्ट आणि सोयीस्कर होणार आहे.
सेवा थांबवण्यामागचे कारण
गेल्या काही महिन्यांत मोनोरेलमध्ये वारंवार तांत्रिक बिघाड होत होते. अनेकवेळा गाड्या मध्येच थांबणे, प्रवाशांना तासन् तास अडकून पडावे लागणे अशा घटना घडल्या. या गंभीर सुरक्षा चिंतेमुळे आणि व्यापक फ्लीट अपग्रेडची गरज लक्षात घेऊन २० सप्टेंबरपासून मोनोरेल सेवा तात्पुरती स्थगित करण्यात आली.
अपग्रेडचे खास आकर्षण
MMMOCL ने सुरु केलेल्या चाचणीनंतर मोनोरेलमध्ये पुढील सुधारणा प्रवाशांसाठी उपलब्ध होणार आहेत -
सुरक्षितता प्रथम : प्रगत CBTC (Communication-Based Train Control) सिग्नलिंग सिस्टम बसवली जाणार आहे. हे तंत्रज्ञान गाड्यांचे संचालन अधिक सुरक्षित, सुरळीत आणि कार्यक्षम करेल.
१० मेड-इन-इंडिया गाड्या : प्रत्येकामध्ये ४ कोच असलेल्या एकूण १० नव्या गाड्या प्रवाशांसाठी धावतील. या देशी तंत्रज्ञानाचा अभिमानास्पद नमुना असतील.
नवीन सुविधा :
सीसीटीव्ही कॅमेरे (सुरक्षेसाठी)
दिव्यांगांसाठी खास आसन व्यवस्था
मोबाइल चार्जिंग पॉइंट्स
डायनॅमिक रूट मॅप्स
आधुनिक व आलिशान इंटीरियर डिझाईन
प्रवासी सोयी वाढवणाऱ्या अन्य सुविधा
जुन्या गाड्यांचे रेट्रोफिटमेंट : आधीच्या रॅकमध्येही आवश्यक बदल करून त्यांना नव्या सुरक्षा आणि आराम मानकांशी जुळवले जाणार आहे.
चाचण्या सुरु
शनिवारी अपग्रेड केलेल्या गाड्यांचे टेस्ट रन झाले असून, रुळांवरून या नव्या चमकदार मोनोरेल गाड्या धावताना दिसल्या. सोशल मीडियावर MMMOCL ने यासंबंधी व्हिडिओ आणि माहिती शेअर केली आहे.
प्रवाशांसाठी काय बदलणार?
सेवा पुन्हा सुरू झाल्यावर प्रवाशांना अधिक सुरक्षित प्रवास, सुरळीत गाड्या, आधुनिक सुविधा आणि वेळेवर सेवा यांचा अनुभव घेता येईल. एक छोटासा ब्रेक घेतलेली मोनोरेल आता अधिक विश्वासार्ह, स्मार्ट आणि प्रवाशानुकूल होऊन परत येणार आहे.
