मुंबई : पवई परिसरात शनिवारी (दि.९) दुपारी घडलेल्या एका हृदयद्रावक हिट-अँड-रन घटनेत ४० वर्षीय सुरक्षा रक्षकाचा मृत्यू झाला. पिकअप वाहनाने धडक दिल्यानंतर चालक घटनास्थळावरून फरार झाला असून, पवई पोलिसांनी अज्ञात चालकाविरोधात गुन्हा दाखल केला आहे.
नेमकं काय घडलं?
पोलिसांनी दिलेल्या माहितीनुसार, मृत सुरक्षा रक्षकाचे नाव अजय सिंग असून ते पवईतील रहिवासी होते. ते हिरानंदानी परिसरात सुरक्षा रक्षक म्हणून काम करत होते. शनिवारी दुपारी साडेबाराच्या सुमारास, अजय सिंग हे चांदिवली फार्म रोडवरील आयआयटी पवई जंक्शनजवळ, लेक होम्स कॉम्प्लेक्स परिसरात रस्त्याच्या कडेला चालत होते. त्याच वेळी MH-03-CP-3179 क्रमांकाच्या पिकअप वाहनाने त्यांना जोरदार धडक दिली.
चालक फरार, मदत न करता पळ काढला
धडकेनंतर अजय सिंग यांच्या चेहरा आणि मानेला गंभीर दुखापत झाली. मात्र वाहनचालकाने थांबून मदत करण्याऐवजी घटनास्थळावरून पळ काढला. स्थानिक नागरिकांनी तातडीने त्यांना हिरानंदानी रुग्णालयात नेलं, जिथे डॉक्टरांनी दुपारी सुमारे १.१० वाजता दाखल करण्यापूर्वीच त्यांना मृत घोषित केलं.
पत्नीने दिली तक्रार
अजय सिंग यांच्या पत्नी मीन सिंग (३८) यांनी पवई पोलीस ठाण्यात तक्रार दाखल केली आहे. त्या घरकाम करून उदरनिर्वाह करतात. घटनेच्या वेळी त्या कामावर असताना स्थानिक नागरिकांकडून अपघाताची माहिती मिळाल्याचं त्यांनी सांगितलं. रुग्णालयात पोहोचल्यानंतर त्यांच्या मोठ्या मुलाने चालक घटनास्थळावरून पळून गेल्याचं सांगितलं.
पोलीस तपास सुरू
या प्रकरणी पवई पोलिसांनी भारतीय न्याय संहिता (BNS) आणि मोटार वाहन कायदा अंतर्गत गुन्हा दाखल केला आहे. पोलीस निरीक्षक गणेश हजारे या प्रकरणाचा तपास करत असून, फरार चालकाचा शोध घेण्यासाठी सीसीटीव्ही फुटेज आणि इतर तांत्रिक पुराव्यांच्या आधारे तपास सुरू आहे.
