नवी दिल्ली : दिल्ली सरकारने रविवारी खासगी कंपन्यांना आठवड्यातून किमान दोन दिवस वर्क फ्रॉम होम धोरण लागू करण्याचा सल्ला दिला आहे. रस्त्यांवरील वाहनांची गर्दी कमी करण्यासाठी कार्यालयांच्या वेळा बदलणे, कर्मचाऱ्यांनी कार पूलिंग किंवा सार्वजनिक वाहतुकीचा वापर करावा, असे कामगार विभागाने मार्गदर्शक सूचनेत म्हटले आहे.
आयटी आणि व्यावसायिक आस्थापनांसह सर्व खासगी क्षेत्रांना हा नियम लागू राहील. मात्र, रुग्णालय, पाणी आणि वीज यांसारख्या अत्यावश्यक व आपत्कालीन सेवा पुरवणाऱ्या खासगी संस्थांना या सल्लागार सूचनेतून वगळण्यात आले असल्याचे प्रशासनाने स्पष्ट केले. सरकारी कर्मचाऱ्यांना आधीच दोन दिवस घरातून काम बंधनकारक करण्यात आले आहे.
खासगी कंपन्यांनी प्रत्यक्ष बैठका ऑनलाइन घ्याव्यात आणि पेट्रोल, डिझेल व सीएनजीचा वापर कमी करण्याची प्रतिज्ञा घ्यावी, अशी माहिती अधिकाऱ्यांनी दिली. दैनंदिन इंधन वापरामध्ये कार्यालयातील प्रवास हा मोठा घटक असल्याने हा निर्णय महत्त्वाचा ठरेल. कर्मचाऱ्यांमध्ये जनजागृती करण्याचे आवाहनही सरकारने केले आहे.
