भावंडांमधील नातं किती निस्वार्थ असू शकतं, याचं हृदयस्पर्शी उदाहरण सोशल मीडियावर व्हायरल होत आहे. ११ डिसेंबर २०२५ रोजी घडलेल्या या घटनेचा व्हिडीओ पाहून नेटकऱ्यांमध्ये चर्चा रंगली आहे.
सीसीटीव्ही फुटेजमध्ये दोन भाऊ आपल्या घराजवळील डोंगर उतारालगत असलेल्या बागेसारख्या परिसरात सायकल चालवताना दिसतात. यावेळी धाकटा भाऊ अचानक सायकलवरील ताबा गमावतो आणि रस्त्याच्या कडेला असलेल्या खोल दरीकडे घसरू लागतो. काही सेकंदांतच तो थेट दरीत पडतो.
ही घटना पाहताच मोठा भाऊ क्षणाचाही विलंब न करता स्वतःचा जीव धोक्यात घालून थेट दरीत उडी मारतो. हा संपूर्ण प्रसंग सीसीटीव्ही कॅमेऱ्यात कैद झाला असून, मोठ्या भावाचे धैर्य, प्रसंगावधान आणि निस्वार्थ प्रेम व्हिडिओतून दिसून येते.
हा व्हिडीओ सोशल मीडियावर झपाट्याने व्हायरल झाला असून, नेटकऱ्यांकडून मोठ्या भावाच्या धाडसाचं भरभरून कौतुक केलं जात आहे. “मोठा भाऊ म्हणजे ढाल,” “हेच खरं भावंडांचं नातं,” अशा प्रतिक्रिया नेटकऱ्यांनी व्यक्त केल्या आहेत. अनेकांनी हा प्रसंग भावंडांमधील नात्याचं जिवंत उदाहरण असल्याचं म्हटलं आहे.
दरम्यान, सोशल मीडियावर आणखी एक हृदयस्पर्शी व्हिडीओ चर्चेत आहे. दिल्लीहून उदयपूरकडे प्रवास करणाऱ्या एका तरुणीने शेअर केलेल्या व्हिडीओमध्ये तिच्या वडिलांनी केवळ दोन मिनिटांसाठी थांबलेल्या ट्रेनमध्ये तिला घरचं अन्न आणि आवश्यक वस्तू देण्यासाठी धाव घेतल्याचा क्षण दिसतो. या भावनिक क्षणानेही नेटकऱ्यांची मनं जिंकली असून, पालक-मुलं या नात्याचं निस्वार्थ प्रेम पुन्हा एकदा अधोरेखित झालं आहे.
या दोन्ही व्हायरल घटनांनी सोशल मीडियावर एकच भावना निर्माण केली आहे, ती म्हणजे प्रेम, धैर्य आणि नात्यांची ताकद आजही जिवंत आहे.
