कर्नाटक उच्च न्यायालयाने तमिळ अभिनेते आणि मक्कल निधी मय्यम पक्षाचे प्रमुख कमल हासन यांच्या वादग्रस्त विधानावर खडेबोल सुनावले आहेत. “कन्नडचा उगम तमिळ भाषेतून झाला आहे” असे विधान केल्यामुळे कर्नाटकात संताप व्यक्त होत असून, न्यायालयाने हासन यांच्यावर कठोर शब्दांत टीका केली आहे. तसेच न्यायालयाने सर्व संबंधित पक्षांना आपली भूमिका स्पष्ट करण्याचे निर्देश दिले आहेत. न्यायालयाने अंतिम निर्णय देण्याआधी हासन यांना आपले विधान मागे घेण्याची आणि माफी मागण्याची संधी दिली आहे. या वादग्रस्त प्रकरणाची पुढील सुनावणी १० जून रोजी दुपारी ३:३० वाजता होणार आहे.
या प्रकरणावर मंगळवारी झालेल्या सुनावणीदरम्यान न्यायमूर्ती एम. नागाप्रसन्ना यांनी नमूद केले की, “तुम्ही इतिहासकार आहात का? तुम्हाला भाषण देण्याचा अधिकार आहे, पण लोकांच्या भावना दुखावण्याचा अधिकार नाही.” त्यांनी पुढे म्हटले की, “तुम्ही माफी मागू शकत नाही का? एवढेच काम करा, तुमचे विधान मागे घ्या. कर्नाटकातून कोट्यवधी रुपये कमावू शकता, पण जर तुम्हाला कन्नड लोकांची गरज वाटत नसेल, तर त्यांच्याकडून मिळणाऱ्या पैशांवर पाणी सोडा.”
न्यायालयाने भाषेच्या संवेदनशीलतेवर भाष्य करताना म्हटले, “पाणी, जमीन आणि भाषा या गोष्टी कोणत्याही नागरिकासाठी अत्यंत महत्त्वाच्या आहेत. भाषेच्या आधारावर देशाची फाळणी झाली आहे. त्यामुळे कोणालाही लोकांच्या भावना दुखावण्याचा अधिकार नाही.”
कमल हासन यांनी या टीकेला उत्तर देताना सांगितले, “मी प्रेमातून जे काही बोललो त्याबद्दल माफी मागणार नाही. ही लोकशाही आहे आणि मला कायदा व न्यायव्यवस्थेवर पूर्ण विश्वास आहे. कर्नाटक, आंध्र प्रदेश आणि केरळवरील माझे प्रेम खरे आहे. जे अजेंडा ठेवून काम करतात, त्यांच्याशिवाय कोणीही माझ्या हेतूंवर प्रश्न उपस्थित करणार नाही.”
KFCC चा चित्रपटविरोधी निर्णय
या वादात कर्नाटक फिल्म चेंबर ऑफ कॉमर्स (KFCC) देखील उतरली आहे. त्यांनी स्पष्टपणे जाहीर केले आहे की, कमल हासन यांनी कन्नड जनतेच्या भावना दुखावल्या असल्यामुळे त्यांच्या ‘ठग लाईफ’ या आगामी चित्रपटाच्या कर्नाटकातील प्रदर्शनाला परवानगी दिली जाणार नाही. या संदर्भात KFCC ने अधिकृत निवेदनही जारी केले आहे.
