मध्य-पूर्वेतील तणाव आणि त्यातून निर्माण झालेली आंतरराष्ट्रीय ऊर्जा बाजारातील अस्थिरता याचे परिणाम आता भारतात स्पष्टपणे जाणवू लागले आहेत. गेल्या काही दिवसांपासून देशात इंधन दरांचा आलेख सातत्याने वर जात आहे. पेट्रोल आणि डिझेलच्या दरवाढीनंतर आता पुन्हा एकदा घरगुती स्वयंपाकाचा गॅस महागला आहे. यामुळे सर्वसामान्य कुटुंबांचे महिन्याचे बजेट आणखी कोलमडण्याची शक्यता निर्माण झाली आहे. गेल्या तीन महिन्यांतील ही दुसरी दरवाढ असून, त्यामुळे महागाईचा भार थेट सामान्य नागरिकांच्या खिशावर पडत असल्याचे चित्र दिसत आहे.
माहितीनुसार, तेल विपणन कंपन्यांनी १४.२ किलोच्या घरगुती LPG सिलिंडरच्या दरात थेट २९ रुपयांची वाढ केली आहे. यामुळे सिलिंडरची किंमत ९१२ रुपयांवरून ९४१ रुपयांपर्यंत वाढली आहे. ही दरवाढ देशातील सर्व प्रमुख शहरांमध्ये लागू करण्यात आली आहे. मुंबई, दिल्ली, कोलकाता यांसह देशभरातील ग्राहकांना आता नवीन दरानुसार सिलिंडर खरेदी करावा लागणार आहे.
मुंबईसह प्रमुख शहरांमध्ये नवीन दर लागू
नवीन दरानुसार दिल्लीमध्ये सिलिंडरची किंमत आता ९१३ रुपयांवरून ९४२ इतकी झाली आहे. मुंबईमध्ये हा दर ९१२.५० वरून ९४१.५० इतका झाला आहे. कोलकातामध्ये सिलिंडर आता ९६८ रुपयांना मिळणार आहे, जो आधी ९३९ इतक्या किंमतीत मिळत होता.
इतर शहरांतील LPG दर
भारतीय तेल निगम (IOC) च्या माहितीनुसार काही प्रमुख शहरांतील नवीन दर असे आहेत:
बंगळुरू:९४४.५० रुपये
अहमदाबाद: ९४९ रुपये
केरळ: ९४९ रुपये
गोवा: ९५६ रुपये
तामिळनाडू: ९५७.५० रुपये
आंतरराष्ट्रीय बाजाराचा परिणाम
जागतिक बाजारात कच्च्या तेल आणि गॅसच्या किंमती वाढल्यामुळे भारतातही एलपीजी (LPG) दर वाढले आहेत. पश्चिम आशियातील परिस्थितीमुळे पुरवठ्यावर परिणाम झाल्याचे सांगितले जात आहे.
सरकारचे स्पष्टीकरण
सरकारच्या पेट्रोलियम विभागाने सांगितले आहे की, देशात LPG पुरवठा सुरळीत आहे. रिफायनऱ्या पूर्ण क्षमतेने काम करत आहेत आणि गॅसची कमतरता नाही.
इंधन दरांमध्ये व्यापक वाढ
फक्त LPG नाही तर पेट्रोल, डिझेल आणि CNGच्या किंमतीतही अलीकडे वाढ झाली आहे. यामुळे सर्वसामान्य नागरिकांवर महागाईचा भार वाढत आहे.
व्यावसायिक सिलिंडरही महाग
१ जूनपासून तेल विपणन कंपन्यांनी व्यावसायिक एलपीजी सिलिंडरच्या किमतींमध्ये वाढ केली आहे. या दरवाढीमुळे देशभरातील हॉटेल, रेस्टॉरंट आणि लहान-मोठ्या व्यवसायांवर इंधन खर्चाचा अतिरिक्त भार पडला आहे.
नवीन दरानुसार दिल्लीत १९ किलोच्या व्यावसायिक एलपीजी सिलिंडरच्या किंमतीत ४२ रुपये इतकी वाढ करण्यात आली असून, सुधारित किंमत आता ३,११३.५० रुपये इतकी झाली आहे. तर कोलकातामध्ये ही दरवाढ आणखी जास्त असून तेथे सिलिंडरच्या किंमतीत ५३.५० रुपयांची वाढ करण्यात आली आहे. त्यामुळे कोलकातामध्ये व्यावसायिक सिलिंडरचा नवीन दर ३,२५५.५० रुपये इतका झाला आहे.
