येत्या 22 जानेवारी रोजी अयोध्येत भगवान श्री रामाच्या मूर्तीची प्राणप्रतिष्ठा करण्यात येणार असून त्यानिमित्ताने देशभरात उत्साहाचे वातावरण आहे. अशात, भगवान रामाबाबत सोशल मीडियावर आक्षेपार्ह पोस्ट केल्याप्रकरणी पोलिसांनी एका व्यक्तीला अटक केली आहे. उत्तर प्रदेशातील प्रयागराजमध्ये कौंधियारा पोलिस ठाण्याच्या हद्दीत ही घटना घडली. शैलेंद्र कुमार कुशवाह (४३) असे आरोपीचे नाव असून तो गौरा या गावातील रहिवासी आहे.
रविवारी संध्याकाळी शैलेंद्रने आपल्या फेसबुक अकाऊंटवरून भगवान रामाविरोधात आक्षेपार्ह मजकूर पोस्ट केला होता. ही पोस्ट व्हायरल झाल्यानंतर स्थानिक संतप्त झाले आणि पोस्टविरोधात कौंधियारा पोलिस ठाण्यात आंदोलन करीत शैलेंद्रवर कारवाई करण्याची मागणी केली होती.
विश्व हिंदू परिषदेचे स्थानिक नेते शिवम मिश्रा यांच्या तक्रारीवरून शैलेंद्रविरोधात एफआयआर दाखल करण्यात आला आहे. संबंधित कलमांतर्गत आरोपीविरुद्ध एफआयआर नोंदवण्यात आली असून त्याला अटक करण्यात आल्याचे पोलीस अधिकाऱ्यांनी सांगितले.