लखनऊ : अयोध्येतील राम मंदिरासाठी मिळालेल्या देणगीच्या रकमेत अफरातफर झाल्याच्या आरोपांची चौकशी करणाऱ्या 'विशेष तपास पथकाने' मंगळवारी आपला प्राथमिक चौकशी अहवाल उत्तर प्रदेश सरकारला सादर केला आहे.
लखनऊचे विभागीय आयुक्त विजय विश्वास पंत यांनी हा प्राथमिक अहवाल अतिरिक्त मुख्य सचिव (गृह) संजय प्रसाद यांच्याकडे सुपूर्द केला. राम मंदिर ट्रस्टच्या विनंतीवरून उत्तर प्रदेश सरकारने १३ जून रोजी या प्रकरणाच्या चौकशीसाठी एसआयटीची स्थापना केली होती.
१०- १५ दिवसांत अंतिम अहवाल
अहवाल सादर केल्यानंतर प्रसारमाध्यमांशी बोलताना विजय विश्वास पंत म्हणाले, आतापर्यंत हाती आलेली माहिती आणि उपलब्ध पुराव्यांच्या आधारे हा पहिला अहवाल सादर केला आहे. ही केवळ प्राथमिक माहिती असून, पुढील १० ते १५ दिवसांत आम्ही अंतिम अहवाल सादर करण्याचा प्रयत्न करत आहोत. हा अहवाल अत्यंत गोपनीय असल्याने त्यातील तपशील उघड करण्यास त्यांनी नकार दिला. तसेच, आवश्यकतेनुसार टीम पुन्हा अयोध्येला भेट देऊन तपास करेल, असेही त्यांनी स्पष्ट केले.
राजकीय आरोप-प्रत्यारोप
७ जून रोजी समाजवादी पक्षाचे अध्यक्ष अखिलेश यादव यांनी राम मंदिराला मिळालेल्या देणगीतील कोट्यवधी रुपये गायब असल्याचा दावा केला होता. या प्रकरणाची न्यायालयाने दखल घ्यावी, अशी मागणी करत त्यांनी भाजप सरकारच्या काळात मोठ्या प्रमाणावर भ्रष्टाचार होत असल्याचा गंभीर आरोप केला होता. या पार्श्वभूमीवर, एसआयटीच्या तपासाकडे संपूर्ण देशाचे लक्ष लागले आहे.
