तुम्ही गेट-टुगेदरचे नियोजन करत असाल, तुमच्या जिवलग मित्राला सरप्राइझ देणार असाल किंवा फक्त कॉफीसोबत सेलिब्रेशन करणार असाल, तर या सोप्या कपकेक रेसिपी बनवायला जितक्या मजेदार आहेत, तितक्याच त्या एकमेकांसोबत शेअर करण्यासाठीही उत्तम आहेत.
क्लासिक व्हॅनिला कपकेक्स
मऊ, स्पॉंजी आणि सर्वांच्या आवडीचे हे क्लासिक व्हॅनिला कपकेक्स कधीही न कंटाळवाणे वाटणारे आहेत. यासाठी मैदा, बेकिंग पावडर, बटर, साखर, अंडी, व्हॅनिला इसेन्स आणि दूध लागते. प्रथम बटर आणि साखर एकजीव करून घ्या. त्यात अंडी आणि व्हॅनिला इसेन्स घाला. त्यानंतर मैदा, बेकिंग पावडर आणि दूध हलक्या हाताने मिसळा. तयार मिश्रण कपकेक लाइनर्समध्ये अर्धे भरा आणि १८० अंश सेल्सिअस तापमानावर १८ ते २० मिनिटे बेक करा. थंड झाल्यानंतर फ्रॉस्टिंग करा.
चॉकलेट कपकेक्स
चॉकलेटची आवड असलेल्या मित्रांसाठी ही रेसिपी अगदी योग्य आहे. यासाठी मैदा, कोको पावडर, बेकिंग पावडर, साखर, दूध, तेल, अंडी आणि व्हॅनिला इसेन्स लागते. प्रथम कोरडे आणि ओले साहित्य वेगवेगळे मिसळा. त्यानंतर दोन्ही मिश्रण एकत्र करून गुळगुळीत बॅटर तयार करा. १८० अंश सेल्सिअस तापमानावर सुमारे २० मिनिटे बेक करा आणि वरून चॉकलेट फ्रॉस्टिंग किंवा वितळलेले चॉकलेट घाला.
रेड वेल्वेट कपकेक्स
आकर्षक रंगाचे हे कपकेक्स फ्रेंडशिप डे सेलिब्रेशनसाठी उत्तम पर्याय आहेत. यासाठी मैदा, कोको पावडर, बटर, साखर, अंडी, बटरमिल्क, लाल फूड कलर आणि व्हॅनिला इसेन्स लागते. सर्व साहित्य एकत्र करून बॅटर तयार करा. त्यात काही थेंब लाल फूड कलर घाला आणि टूथपिक स्वच्छ बाहेर येईपर्यंत बेक करा. शेवटी क्रीम चीज फ्रॉस्टिंगने सजवा
लेमन कपकेक्स
हलके, ताजेतवाने आणि पावसाळ्यातील दुपारसाठी योग्य असे हे लेमन कपकेक्स आहेत. यासाठी मैदा, बटर, साखर, अंडी, दूध, लिंबाची किसलेली साल आणि लिंबाचा रस लागतो. सर्व साहित्य एकत्र करून गुळगुळीत बॅटर तयार करा आणि बेक करा. थंड झाल्यानंतर अधिक चवदार बनवण्यासाठी वरून साधा लेमन ग्लेझ घाला.
ओरिओ कपकेक्स
कुकीज आवडणाऱ्यांसाठी ही एक मजेशीर रेसिपी आहे. यासाठी व्हॅनिला कपकेक बॅटर, चुरलेली ओरिओ बिस्किटे आणि व्हीप्ड क्रीम किंवा बटरक्रीम लागते. बेक करण्यापूर्वी बॅटरमध्ये चुरलेली ओरिओ बिस्किटे मिसळा. त्यानंतर फ्रॉस्टिंग करून वर एक ओरिओ बिस्किट ठेवून सजवा.
कॉफी कपकेक्स
मित्रांसोबत कॉफीचा आनंद घेताना हे कपकेक्स उत्तम पर्याय ठरतात. यासाठी मैदा, बटर, साखर, अंडी, दूध आणि कोमट पाण्यात विरघळवलेली इन्स्टंट कॉफी लागते. कॉफीचे मिश्रण बॅटरमध्ये घालून सोनेरी रंग येईपर्यंत बेक करा. वरून कॉफी बटरक्रीम किंवा व्हीप्ड क्रीमने सजवा.
रेनबो स्प्रिंकल कपकेक्स
रंगीबेरंगी स्प्रिंकल्समुळे कोणतेही सेलिब्रेशन अधिक आनंदी बनवणारे हे कपकेक्स आहेत. यासाठी व्हॅनिला कपकेक बॅटर, रेनबो स्प्रिंकल्स आणि बटरक्रीम फ्रॉस्टिंग लागते. बॅटरमध्ये स्प्रिंकल्स हलक्या हाताने मिसळा, बेक करा आणि नंतर अधिक स्प्रिंकल्स घालून सजवा.
या Friendship Day ला स्वतः बनवलेल्या कपकेक्सने मित्रांना खास सरप्राइज द्या आणि आठवणी अधिक गोड करा.
