प्राजक्ता पोळ / मुंबई
अणुशक्ती नगरचे आमदार नवाब मलिक हे राष्ट्रवादी काँग्रेसच्या अजित पवार गटातून मानखुर्द शिवाजी नगर मतदारसंघातून निवडणूक लढवण्यासाठी सज्ज होत असताना त्यांच्या उमेदवारीला भाजपकडून प्रखर विरोध करण्यात येत आहे.
दरम्यान, मलिक यांच्या कन्या सना मलिक या अणुशक्ती नगरमधून निवडणूक लढवण्याची शक्यता आहे. मलिक कुटुंबीयांनी 'नवशक्ति आणि फ्री प्रेस जर्नल'ला सांगितले की, आम्ही निवडणुकीसाठी पूर्णपणे तयार आहेत, फक्त पक्षाकडून अधिकृत उमेदवारी जाहीर होणे बाकी आहे. तथापि, नवाब मलिक यांच्या उमेदवारीचा भाजपकडून तीव्र विरोध केला जात आहे.
भाजप नेते आशिष शेलार यांनी सांगितले की, दाऊदशी संबंधित असलेल्या व्यक्तीला तिकीट देणे पक्षाला मान्य नाही. शेलार यांनी भाजपच्या वतीने नवाब मलिक यांच्या उमेदवारीचा खुलेपणाने विरोध केला आहे. त्यामुळे आता अजित पवार या विरोधाला कसे उत्तर देतात हे महत्त्वाचे ठरणार आहे. मलिक यांनी यापूर्वी महाविकास आघाडी सरकारमध्ये मंत्री म्हणून काम पाहिले आहे, परंतु दाऊद इब्राहिम यांच्याशी संबंधित आरोपांमुळे त्यांना तुरुंगात जावे लागले होते. भाजप यांचा मलिक यांना विरोध असण्याचे हेच मुख्य कारण आहे.
मलिक यांना वैद्यकीय कारणांमुळे जामीन मंजूर करण्यात आला आहे. पक्षफुटीनंतर मलिक नागपूरमधील विधानसभेच्या सत्रात सत्ताधारी पक्षासोबत बसले होते, यावरून स्पष्ट होते की ते अजित पवार गटाचा भाग आहेत. त्यावेळी उपमुख्यमंत्री देवेंद्र फडणवीस यांनी नवाब मलिक यांना अजित पवारांनी आपल्या गटात सामील करू नये, अशी विनंती करणारे पत्र लिहिले होते. मात्र, अजित पवार यांनी त्याकडे दुर्लक्ष करून मलिक यांचे त्यांच्या गटात स्वागत केले होते.
अजित पवार यांनी नवाब मलिक यांना शिवाजी नगर-मानखुर्द मतदारसंघातून तिकीट देण्याचा निर्णय घेतला आहे. तसेच, मलिक यांची मुलगी सना मलिक यांनाही अणुशक्ती नगरमधून निवडणूक लढवण्यासाठी तिकीट मिळण्याची शक्यता आहे.
नवाब मलिक यांच्या महायुती सरकारच्या काही समारंभातील उपस्थितीबाबतही यापूर्वी आक्षेप घेण्यात आला होता.