आयझॉल : भाजप नेतृत्वाखालील एनडीए आघाडीचा घटक पक्ष असलेल्या मिझो नॅशनल फ्रंट (एमएनएफ) पक्षाचे मिझोरामचे मुख्यमंत्री झोरामथांगा यांनी, आगामी विधानसभा निवडणुकीच्या प्रचारासाठी पंतप्रधान मोदी येथे आल्यावर त्यांच्यासोबत मंचावर बसणार नाही. असे सांगून भाजपबाबतची नाराजी सार्वजनिकरीत्या जाहीर केली आहे.
पंतप्रधानांनी येथे एकटे येऊन मंचावर एकट्याने आपले विचार मांडले तर बरे होईल, असे ते म्हणाले. यानंतर मी स्वतंत्रपणे मंचावर येईन. मिझोरामचे लोक ख्रिश्चन आहेत. मणिपूरमधील मैतेई लोकांनी शेकडो चर्च जाळले, तेव्हा मिझोरामच्या सर्व लोकांनी निषेध केला. परिणामी भाजपबद्दल सहानुभूती दाखवणे हा माझ्या पक्षासाठी मोठा मायनस पॉइंट असेल, असे मिझोरामचे मुख्यमंत्री म्हणाले आहेत.
मिझोराममध्ये येत्या ७ नोव्हेंबरला विधानसभा निवडणुका होणार आहेत, ज्याचे निकाल ३ डिसेंबरला येतील. निवडणुकीपूर्वी, ३०ऑक्टोबर रोजी पंतप्रधान मोदी भाजप उमेदवारांच्या समर्थनार्थ रॅली काढण्यासाठी पश्चिम मिझोराममधील मामित गावात येण्याची शक्यता आहे.
मात्र काँग्रेस आघाडीत जाणार नाही
झोरामथांगाचा पक्ष मिझो नॅशनल फ्रंट भाजपच्या नेतृत्वाखालील नॉर्थ ईस्ट डेमोक्रॅटिक अलायन्स आणि केंद्रातील सत्ताधारी एनडीएचा सदस्य आहे. तथापि, मिझोराममध्ये एमएनएफ भाजपपेक्षा वेगळा आहे. सीएम जोरमथांगा म्हणाले, त्यांचा पक्ष एनडीए आणि एनईडीएमध्ये सामील झाला. कारण तो काँग्रेसच्या विरोधात आहे. आम्ही कोणत्याही काँग्रेस आघाडीचा भाग होऊ इच्छित नाही.
