नवी दिल्ली : अनुभवी वेगवान गोलंदाज भुवनेश्वर कुमारचे तब्बल ४ वर्षांनी भारताच्या टी-२० संघात पुनरागमन झाले आहे. न्यूझीलंडविरुद्धच्या आगामी पाच सामन्यांच्या टी-२० मालिकेसाठी भारतीय संघ जाहीर करण्यात आला असून यामध्ये भुवनेश्वरला स्थान लाभले आहे. २२ ऑक्टोबरपासून भारतीय संघ न्यूझीलंड दौऱ्यावर जाणार असून उभय संघांत ५ टी-२०, ५ एकदिवसीय व २ कसोटी सामने होणार आहेत. त्यांपैकी तूर्तास टी-२० मालिकेचा संघ घोषित करण्यात आला आहे.
३६ वर्षीय मेरठचा भुवनेश्वर रॉयल चॅलेंजर्स बेंगलुरुच्या (आरसीबी) सलग दोन आयपीएल विजयांमध्ये महत्त्वाचा शिलेदार राहिला असून, त्याने गेल्या हंगामात १७ गडी बाद करत पॉवरप्लेच्या षटकांमध्ये सर्वोत्तम फलंदाजांना ‘सळो की पळो’ करून सोडले होते. नोव्हेंबर २०२२मध्ये न्यूझीलंडविरुद्धच नेपियर येथे भुवनेश्वर अखेरचा आंतरराष्ट्रीय टी-२० सामना खेळला होता. कसोटी व एकदिवसीय संघातून तो कधीच बाहेर गेला आहे. मात्र आता भुवनेश्वरकडे किमान टी-२० प्रकारात पुन्हा छाप पाडण्याची संधी आहे.
निवड समितीचे माजी अध्यक्ष अजित आगरकर यांच्या भूमिकेमुळे भुवनेश्वरचे पुनरागमन लांबणीवर पडले होते, कारण आगरकर जुन्या कामगिरीकडे मागे वळून पाहण्याच्या बाजूने नव्हते. मध्य क्षेत्राचे निवडकर्ते रुद्रप्रताप सिंह यांनी नेहमीच भुवनेश्वरच्या समावेशासाठी बाजू मांडली होती. मात्र आगरकर पायउतार झाल्यानंतर, जसप्रीत बुमराच्या अनुपस्थितीत अनुभवी गोलंदाजाचे महत्त्व प्रज्ञान ओझा आणि इतर सहकाऱ्यांना पटवून देणे कठीण गेले नाही. आपल्या अनुभवाच्या जोरावर तो २०२८च्या ऑस्ट्रेलियातील टी-२० विश्वचषकासाठी संभाव्य दावेदार मानल्या जाणाऱ्या मयांक यादव आणि प्रिन्स यादव यांसारख्या युवा खेळाडूंना मार्गदर्शन करू शकतो.
बीसीसीआयने जाहीर केलेल्या या संघात, आशियाई दुखापतीमुळे बाहेर असलेल्या फिरकीपटू वरुण चक्रवर्तीचेही पुनरागमन झाले असून, हा संघ अजित आगरकर यांचा कार्यकाळ संपल्यानंतर ओझा यांच्या अंतरिम अध्यक्षपदाखाली निवडलेला पहिलाच संघ आहे. वरुण दुखापतीमुळे जवळपास २ महिने संघाबाहेर होता.
भारत आणि न्यूझीलंड यांच्यातील टी-२० मालिकेला २२ ऑक्टोबरपासून सुरूवात होणार असून पहिले दोन सामने ख्राईस्टचर्च येथे खेळवले जातील. यानंतर २७ ऑक्टोबरला वेलिंग्टन, ३० ऑक्टोबरला ऑकलंड आणि १ नोव्हेंबरला हॅमिल्टन येथे सामने होणार आहेत.
