भारतीय क्रिकेट संघाचे माजी कर्णधार आणि क्रिकेट असोसिएशन ऑफ बंगाल (CAB) चे अध्यक्ष सौरव गांगुली यांनी आपल्या नावाचा वापर करून खोटी आणि दिशाभूल करणारी माहिती प्रसारित केल्याचा आरोप करत एका सोशल मीडिया पेजविरोधात पोलिसांत तक्रार दाखल केली आहे. त्यांच्या घरावर ईडीने छापा टाकल्याची चुकीची माहिती संबंधित पेजवर प्रसारित करण्यात आल्याचा आरोप असून, या प्रकरणी कोलकात्यातील ठाकूरपुकूर पोलिस ठाण्यात FIR नोंदवण्यात आला आहे.
सोशल मीडिया पेजविरोधात तक्रार
सौरव गांगुली यांनी कोलकाता पोलिसांकडे दिलेल्या तक्रारीत 'सौरव गांगुली फॅन' (Sourav Ganguly Fan) नावाच्या फेसबुक पेजचा आणि 'स्पोर्ट्सविकी' (SportsWiki) या वेबसाईटचा उल्लेख केला आहे. संबंधित माध्यमांद्वारे त्यांची प्रतिमा मलिन करण्याचा प्रयत्न होत असल्याचा आरोप त्यांनी केला आहे.
ईडीच्या छाप्याची खोटी माहिती व्हायरल
तक्रारीनुसार, फेसबुक पेज आणि वेबसाईटवर सौरव गांगुली यांच्या घरावर अंमलबजावणी संचालनालयाने (ED) छापा टाकल्याची खोटी माहिती प्रसारित करण्यात आली होती. संबंधित फेसबुक पेजला ३६ लाखांहून अधिक फॉलोअर्स असल्याने ही माहिती अल्पावधीतच मोठ्या प्रमाणावर व्हायरल झाली. त्यामुळे त्यांच्या प्रतिमेला धक्का पोहोचल्याचा आरोप गांगुली यांनी केला आहे.
"प्रतिमा मलिन करण्याचा प्रयत्न"
गांगुली यांनी तक्रारीत म्हटले आहे की, संबंधित पेजवर सातत्याने अशा प्रकारच्या पोस्ट शेअर केल्या जात आहेत ज्यांचा उद्देश त्यांच्याबाबत जनतेमध्ये नकारात्मक भावना निर्माण करणे आणि प्रतिमा मलिन करणे हा आहे.
"सार्वजनिक व्यक्तिमत्त्व म्हणून टीका आणि मतभेद हा सार्वजनिक जीवनाचा भाग असल्याची मला जाणीव आहे. मात्र, जाणूनबुजून खोटी, दिशाभूल करणारी आणि बदनामीकारक माहिती पसरवणे चुकीचे आहे. अशा प्रकारांवर योग्य कायदेशीर कारवाई होणे आवश्यक आहे," असे त्यांनी तक्रारीत नमूद केले आहे.
पोलिसांकडून तपास सुरू
या प्रकरणी ठाकूरपुकूर पोलिस ठाण्यात FIR दाखल करण्यात आला असून, संबंधित फेसबुक पेज आणि वेबसाईटच्या माध्यमातून माहिती प्रसारित करणाऱ्यांची चौकशी सुरू करण्यात आली आहे. प्रकरणाचा तपास सुरू असून पुढील कारवाईबाबत पोलिसांकडून अधिक माहितीची प्रतीक्षा आहे.
क्रिकेट वर्तुळात चर्चेला उधाण
भारतीय क्रिकेटमधील एक मोठे नाव असलेल्या सौरव गांगुली यांनी थेट पोलिसांत धाव घेतल्यामुळे या प्रकरणाची चर्चा क्रिकेट आणि सोशल मीडिया वर्तुळात रंगली आहे. सोशल मीडियावर खोटी माहिती पसरवण्याच्या वाढत्या घटनांच्या पार्श्वभूमीवर या प्रकरणाकडे विशेष लक्ष लागले आहे.
