न्यूयॉर्क : अमेरिकन ओपन ग्रँडस्लॅम टेनिस स्पर्धेत मंगळवारी जपानची नाओमी ओसाका व पोलंडची इगा स्विआटेक यांना गाशा गुंडाळावा लागला. एलिना रायबॅकिना व कोको गॉफ यांनी उपांत्यपूर्व फेरी गाठली, तर पुरुषांमध्ये बेन शेल्टन, वॅन झँडस्कल्प यांनी आगेकूच केली.
अमेरिकन ओपन या वर्षातील चौथ्या व अखेरच्या ग्रँडस्लॅम स्पर्धेच्या मुख्य फेरीला गेल्या रविवारपासून प्रारंभ झाला. यंदा या स्पर्धेचे १४६वे वर्ष सुरू आहे. २०२५मध्ये स्पेनचा कार्लोस अल्कराझ आणि बेलारूसची आर्यना सबालेंका यांनी अमेरिकन ओपनचे जेतेपद मिळवले होते. पुरुषांमध्ये इटलीच्या यॅनिक सिनरच्या अनुपस्थितीत जर्मनीच्या अलेक्झांडर झ्वेरेव्हला, तर महिलांमध्ये सबालेंकाला अग्रमानांकन प्राप्त झाले आहे.
या वर्षाची ऑस्ट्रेलियन ओपन विजेती आणि दोन ग्रँड स्लॅम विजेती असलेल्या रायबॅकिनाला अव्वल स्थानावर पोहोचण्यासाठी पुढील सामन्यात चीनच्या झेंग शिनवेनचे आव्हान पार करावे लागणार आहे. ओसाकाविरुद्धचा हा सामना केवळ १ तास ६ मिनिटे चालला. रायबॅकिनाने दमदार सर्व्हिस आणि बिनचूक आक्रमणाच्या जोरावर विजय मिळवला. ती सध्या डब्ल्यूटीए टूरवर सर्वाधिक एसेस मारणाऱ्या खेळाडूंमध्ये आघाडीवर आहे.
दुसऱ्या बाजूने, पॅरिस ऑलिम्पिक सुवर्णपदक विजेत्या चीनच्या झेंग शिनवेनने पुन्हा एकदा ५-० अशा मोठ्या पिछाडीवरून जोरदार पुनरागमन करत ८ व्या मानांकित इगा स्विआटेकचा ७-५, ६-३ असा पराभव केला. २०२१ मधील एम्मा राडुकानुनंतर युएस ओपनच्या उपांत्यपूर्व फेरीत पोहोचणारी झेंग ही पहिली क्वालिफायर खेळाडू ठरली आहे. कोपर कोपराच्या शस्त्रक्रियेनंतर मानांकन घसरल्यामुळे झेंगला यंदा पात्रता फेरीतून मुख्य फेरीत यावे लागले होते. इतर सामन्यांमध्ये, चौथ्या मानांकित कोको गॉफने १४व्या मानांकित इव्हा जोव्हिकचा ६-१, ६-४ असा पराभव करून उपांत्यपूर्व फेरी गाठली. तिची पुढील लढत ५ व्या मानांकित मिरा अंद्रेवा हिच्याशी होईल, जिने अनास्तासिया पोतापॉव्हाचा ५-७, ६-४, ६-३ असा पराभव केला.
