मुरबाड : मुरबाड तालुक्यातील डोंगरदऱ्यांमध्ये भक्तिमय वातावरण निर्माण झाले आहे. पहिल्याच श्रावणी सोमवारच्या पार्श्वभूमीवर भोलेनाथांच्या दर्शनासाठी भक्तांनी मुरबाडच्या डोंगरन्हवे मार्गे गोरखगडाच्या घनदाट जंगलातून भीमाशंकरकडे पायी वाटचाल सुरू केली आहे.
श्रावण महिन्यातील सोमवारी भगवान शंकराच्या दर्शनासाठी भाविक मोठ्या संख्येने या शिवकालीन मार्गाचा वापर करतात. श्रावणी सोमवारी परिसरातील शिवमंदिरांमध्येही भक्तांची गर्दी वाढली आहे.
मुरबाड तालुक्यात भीमाशंकर, नाणेघाट, गोरखगड, सिद्धगड, हरिश्चंद्रगड आणि माळशेज घाट अशी अनेक प्रसिद्ध पर्यटनस्थळे आहेत. तरीही भीमाशंकरच्या शिवमंदिरात दर्शनासाठी जाणाऱ्या भाविकांची गर्दी वाढताना दिसत आहे.
म्हसा-डोंगरन्हवे मार्गे घनदाट जंगलातून भीमाशंकरकडे जाणारा हा शिवकालीन पायी मार्ग असून, स्थानिक परिसरातील भाविक श्रावण महिन्यात दर सोमवारी या मार्गाने भोलेनाथाच्या दर्शनासाठी जातात. श्रावणातील शनिवार आणि रविवारच्या काळातही या मार्गावर भक्तांची वर्दळ वाढते.
मुरबाड तालुक्यातील म्हसा येथील म्हसोबा मंदिरात सोमवारी स्थानिक भाविकांची मोठी गर्दी होते. मुरबाड शहरालगतच्या घोडदेश्वर शिवमंदिरातही उपवास करणारे भाविक दर्शनासाठी रांगा लावतात. तसेच श्री क्षेत्र संगमेश्वर येथील नदीकिनारी असलेल्या शिवमंदिरात पहाटेपासून अभिषेक, पूजा, आरतीसाठी गर्दी होते.
भीमाशंकर मंदिरातील आरतीचा भक्तिमय नाद म्हसोबा मंदिरापर्यंत ऐकू येत असल्याची चर्चा असून, संगमेश्वर शिवमंदिरातील धार्मिक वातावरणामुळे त्र्यंबकेश्वर मंदिरातील भक्तिमय सोहळ्याची अनुभूती येत असल्याची भावना भाविक व्यक्त करीत आहेत.
