डोंबिवली : स्वतःच्या पायावर उभे राहून व्यवसाय करण्याचा निर्धार केलेल्या डोंबिवलीतील एका तरुणीवर झालेल्या मराठी केडीएमसीकडून कारवाईमुळे तिच्या डोळ्यांत अश्रू आले. आपली व्यथा तिने सामाजिक माध्यमांवर व्हिडीओच्या माध्यमातून मांडत, "मराठी मुलीच्या पाठीशी कोणी उभे राहील का?" असा भावनिक सवाल केला होता. हा व्हिडीओ मनसे अध्यक्ष राज ठाकरे यांच्या पाहण्यात आला आणि त्यांनी तत्काळ मनसैनिकांना तिच्या मदतीला धाव घेण्याचे निर्देश दिले.
मनसेचे नेते अविनाश जाधव यांनी डोंबिवलीत येऊन संबंधित तरुणीची प्रत्यक्ष भेट घेतली व तिला सर्वतोपरी मदत करण्याचे आश्वासन दिले. मनसेकडून मिळत असलेल्या पाठिंब्याबद्दल तरुणीने मनसेचे आभार मानले. डोंबिवली परिसरात ही मराठी तरुणी गाडीवरून शोरमा विक्रीचा व्यवसाय करत असून, पालिकेकडून केवळ तिच्याच गाडीवर वारंवार कारवाई केली जात असल्याचा आरोप तिने केला आहे. दुसरीकडे, स्टेशन परिसरात मोठ्या प्रमाणावर असलेल्या परप्रांतीय फेरीवाल्यांकडे स्थानिक पोलीस व केडीएमसीकडून जाणूनबुजून दुर्लक्ष केले जात असल्याचा आरोपही करण्यात येत आहे.
मराठी तरुणीच्या आम्ही ठामपणे पाठीशी आहोत. मराठी माणसावर होणारा अन्याय सहन केला जाणार नाही. महापालिकेच्या दुटप्पी धोरणाविरोधात रस्त्यावर उतरून संघर्ष केला जाईल.
अविनाश जाधव, मनसे नेते
