विमानसेवा क्षेत्रात कार्यरत असलेल्या २३ वर्षीय एअर होस्टेसवर तिच्याच सहकाऱ्याने बलात्कार केल्याची धक्कादायक घटना समोर आली आहे. पीडितेच्या तक्रारीवरून नवघर पोलिसांनी आरोपीला अटक केली असून या प्रकरणाचा पुढील तपास सुरू आहे.
लंडनहून परतल्यानंतर घडली घटना
पोलिसांनी दिलेल्या माहितीनुसार, पीडित तरुणी आणि आरोपी दोघेही क्रू मेंबर म्हणून काम करत असून २९ जून रोजी ते लंडनहून मुंबईत परतले होते. परत आल्यानंतर आरोपीने पीडितेला मिरा रोड येथील आपल्या घरी बोलावले. तिथेच त्याने बलात्कार केला, असा गंभीर आरोप महिलेने केला आहे.
प्राथमिक चौकशीत असेही समोर आले आहे की, पीडिता आणि आरोपी यांच्यात पूर्वीपासून ओळख होती व त्यांनी अनेकदा एकत्र प्रवास केला होता. हीच ओळख वापरून आरोपीने विश्वासघात केला, असा पोलिसांचा अंदाज आहे.
आरोपी अटकेत
या प्रकरणी नवघर पोलीस ठाण्यात एफआयआर दाखल करण्यात आला असून आरोपीविरोधात भारतीय न्याय संहिता अंतर्गत बलात्कार, धमकी आणि अपमानास्पद वर्तन यांसारख्या कलमांनुसार गुन्हा दाखल करण्यात आला आहे. आरोपी २५ वर्षांचा असून मिरा रोड परिसरात राहतो. १९ जुलै रोजी त्याला अटक करण्यात आली.
पुढील तपास सुरू
पोलीस या प्रकरणाची सखोल चौकशी करत असून पीडितेचे वैद्यकीय परीक्षणही करण्यात आले आहे. पोलिसांकडून आरोपीविरोधात ठोस पुरावे गोळा केले जात असून, लवकरच आरोपपत्र दाखल करण्यात येईल, असे अधिकाऱ्यांनी सांगितले.
