काव्यकट्टा
एकनाथ आव्हाड
एकदा एका गरुडाने
सशाचा पाठलाग केला
बिचारा ससा आपला
खूपच घाबरून गेला
हे एका दीडशहाण्या
चिमणीने पाहिले
घाबरलेल्या सशाला
रागाने विचारले
कशाला घाबरतोस?
चपळ प्राण्यासारखं वाग
दूर पळून जायचं
कुणी काढणार नाही माग
उपदेश करता करता
तेवढ्यात ससाणा दिसला
पटकन उडून जाण्याचा
चिमणीचा बेत फसला
ससाण्याने चिमणीला
पंजात पकडले
फडफडणाऱ्या चिमणीला
चांगलेच जखडले
ससा म्हणाला तिला
घाबरलात चिऊताई?
उपदेश तुमचा गेला कुठे
सांगा आता काही?
साहित्य अकादमी बालसाहित्य पुरस्कारप्राप्त लेखक
eknathavhad23@gmail.com