मुंबई/मॉस्को : रशियाच्या अधिकृत दौऱ्यावर असलेले परराष्ट्र मंत्री डॉ. एस. जयशंकर यांनी मॉस्कोमधील भारत-रशिया व्यवसाय मंचाला संबोधित केले आणि रशियासोबत व्यापार वाढवण्यावर भर दिला. त्यांनी रशियन कंपन्यांना भारतीय कंपन्यांसोबत अधिक व्यवसाय करण्यास प्रोत्साहित केले. जयशंकर यांनी आघाडीच्या रशियन विद्वान आणि थिंक टँकच्या प्रतिनिधींशी संवाद साधला आणि भारत-रशिया संबंध तसेच जागतिक भूराजकीय आणि समकालीन आव्हानांवरील भारताच्या दृष्टिकोनावर विचारांची देवाणघेवाण केली.
डॉ. जयशंकर यांनी बुधवारी व्यापार, आर्थिक, वैज्ञानिक, तांत्रिक आणि सांस्कृतिक सहकार्यावरील भारत-रशिया आंतरसरकारी आयोगाच्या २६ व्या सत्राचे सह-अध्यक्षपद भूषवले.
जयशंकर म्हणाले की, त्यांनी २०२१ मध्ये १३ अब्ज अमेरिकन डॉलरवरून २०२४-२५ मध्ये ६८ अब्ज अमेरिकन डॉलरपर्यंत द्विपक्षीय व्यापाराची जलद वाढ तसेच वाढत्या व्यापार असमतोलात सुधारणा करण्याची तातडीची गरज अधोरेखित केली, जी नऊ पटीने वाढली आहे.
परराष्ट्रमंत्री भारत-रशिया व्यवसाय मंचात प्रथम उपपंतप्रधान डेनिस मंटुरोव्ह यांच्यासोबत सहभागी झाले. व्यापारी प्रमुखांना संबोधित करताना डॉ. जयशंकर यांनी भर दिला की भारत आणि रशिया केवळ व्यापाराद्वारेच नव्हे तर गुंतवणूक, संयुक्त उपक्रम आणि सखोल सहकार्याद्वारे देखील एकमेकांच्या विकासात योगदान देऊ शकतात.