रशिया पंतप्रधान नरेंद्र मोदी यांना आपल्या देशाचा सर्वोच्च नागरी सन्मान (ऑर्डर ऑफ सेंट अँड्र्यू द अपॉस्टल) देणार आहे. नवी दिल्लीतील रशियन दूतावासाने शुक्रवारी ही माहिती दिली. रशियाशी संबंध दृढ करण्यासाठी आंतरराष्ट्रीय नेतृत्वासाठी योगदान देणाऱ्या व्यक्तींना हा पुरस्कार दिला जातो. भारत आणि रशियामधील संबंध दृढ करण्यासाठी पंतप्रधान नरेंद्र मोदी यांनाही हा पुरस्कार प्रदान करण्यात येत आहे.

१६९८ साली रशियाच्या महान झार शासकाने याची स्थापना केली होती आणि अलिकडच्या काही वर्षांत हा सन्मान गैर-रशियन व्यक्तींना देण्याची परंपरा सुरू झाली होती. पंतप्रधान नरेंद्र मोदींपूर्वी हा सन्मान चीनचे राष्ट्राध्यक्ष शी जिनपिंग, कझाकिस्तानचे राष्ट्राध्यक्ष नजरबायेव आणि अझरबैजानचे राष्ट्राध्यक्ष हैदर अलीयेव यांना देण्यात आला आहे.

रशियन सरकारने जारी केलेल्या एका संक्षिप्त निवेदनात म्हटले आहे की, भारत आणि रशियामधील संबंध अधिक बळकट करण्यासाठी आणि विशेष धोरणात्मक भागीदारी मजबूत करण्यासाठी पंतप्रधान नरेंद्र मोदी यांना हा सन्मान देण्यात आला आहे. विज्ञान, कला आणि संस्कृतीत अतुलनीय योगदान देणाऱ्या प्रबुद्ध राजकारण्यांना, सार्वजनिक व्यक्तींना हा सन्मान दिला जातो, असे रशियाचे म्हणणे आहे. इतर देशांच्या राष्ट्रप्रमुखांनाही त्यांच्या विशेष योगदानासाठी हा सन्मान दिला जातो.

काही आठवड्यांपूर्वी, UAE सरकारने पंतप्रधान नरेंद्र मोदी यांना सर्वोच्च नागरी सन्मान, झायेद पदक देऊन सन्मानित करण्याची घोषणा केली होती. भारत आणि यूएई यांच्यातील संबंधांना नव्या उंचीवर नेण्यासाठी हा सन्मानही त्यांना देण्यात आला आहे. वरील दोन सन्मानांव्यतिरिक्त, पंतप्रधान मोदींना आतापर्यंत आणखी पाच आंतरराष्ट्रीय सन्मान मिळाले आहेत. ऑक्टोबर २०१८ मध्ये त्यांना सोल पीस पुरस्काराने सन्मानित करण्यात आले.