जिनिव्हा : ‘वर्ल्ड इकॉनॉमिक फोरम’चे अध्यक्ष आणि सीइओ बोर्गे ब्रेंडे यांनी आपल्या पदाचा राजीनामा दिला आहे. त्यांचा हा निर्णय अशावेळी आला आहे, जेव्हा काही आठवड्यांपूर्वीच जिनिव्हा येथील या संस्थेने लैंगिक गुन्हेगार जेफरी एपस्टीनसोबतच्या त्यांच्या संबंधांची चौकशी सुरू केली होती. ब्रेंडे हे २०१७ पासून वर्ल्ड इकोनॉमिक फोरमचे नेतृत्व करत होते. सध्या, स्वित्झर्लंडमधील या संस्थेने त्यांच्या राजीनाम्याची पुष्टी करत एलोइस ज्विंगी यांना अंतरिम जबाबदारी सोपवली आहे.
रॉयटर्सच्या वृत्तानुसार, अमेरिकेच्या न्याय विभागाच्या कागदपत्रांमधून असे पुढे आले होते की, ब्रेंडे यांनी एपस्टीनसोबत तीन व्यावसायिक डिनर केले होते. याव्यतिरिक्त, त्यांच्यात ईमेल आणि टेक्स्ट मेसेजद्वारेही संवाद झाला होता. या खुलास्यानंतर, जिनिव्हा येथील या संस्थेने ब्रेंडे यांच्या मागील संपर्कांची स्वतंत्र चौकशी सुरू केली होती.