तेल अवीव : दहशतवादी संघटना हिजबुल्लाने लेबनॉनमध्ये कमांडरच्या हत्येचा बदला घेण्यासाठी इस्रायलवर रविवारी ३०० हून अधिक रॉकेट डागली. इस्रायलच्या ११ सैन्य तळांवर हे हल्ले करण्यात आले. या हल्ल्याला प्रत्युत्तर देताना इस्रायलच्या १०० लढाऊ विमानांनी हिजबुल्लाचे रॉकेट लाँचर उद्ध्वस्त केले.
इस्रायली सेना ‘आयडीएफ’ने सांगितले की, हिजबुल्लाने डागलेले बहुतेक रॉकेट ‘आर्यन डोम’च्या मदतीने हवेतच नष्ट केली. इस्रायलने तत्काळ मंत्रिमंडळाची बैठक घेतली. तसेच देशात ४८ तासांची आणीबाणी जाहीर केली आहे. पंतप्रधान बेंजामिन नेत्यानाहू म्हणाले की, देशाच्या सुरक्षेसाठी आम्ही कटिबद्ध आहोत. जो आमचे नुकसान करेल, त्यांना आम्ही सोडणार नाही, असे त्यांनी ठणकावले.
इस्रायलचे संरक्षणमंत्री योआव गॅलंट यांनी येत्या ४८ तासांसाठी देशात आणीबाणीची घोषणा केली. दरम्यान, हिजबुल्लाचा गड असलेल्या दक्षिण लेबनॉनमधील नागरिकांना तत्काळ घर सोडण्याचे आवाहन इस्रायली लष्कराने केले आहे.