तेलअवीव/तेहरान : इस्रायलने इराणमधील अनेक ठिकाणी हवाई हल्ले केले, ज्यामध्ये इस्लामिक रिव्होल्यूशनरी गार्ड कॉर्प्सच्या ठिकाणांना लक्ष्य केले. इस्फहानमधील आयआरजीसीचे पोलिस मुख्यालय आणि इराणी लष्कराच्या बसिज फोर्सने वापरलेल्या कमांड सेंटरचाही या हल्ल्यात सहभाग असल्याचे वृत्त आहे. इस्रायली लष्कराने असेही म्हटले आहे की हल्ल्यात रॉकेट इंजिन निर्मिती कारखाना आणि लांब पल्ल्याच्या क्षेपणास्त्र प्रक्षेपण स्थळालाही लक्ष्य करण्यात आले.

दरम्यान, भारताचे परराष्ट्र मंत्री एस. जयशंकर यांनी संसदेत सांगितले की, इराणने आपल्या तीन नौदल जहाजांना भारतीय बंदरांमध्ये थांबण्याची परवानगी मागितली होती. ही विनंती २८ फेब्रुवारीला करण्यात आली व भारताने १ मार्चला परवानगी दिली. त्यापैकी एक जहाज आयरिस लावण हे ४ मार्चला कोची बंदरात आले. त्या जहाजाचे खलाशी सध्या भारतीय नौदलाने पुरविलेल्या सुविधांमध्ये राहात आहेत.

दुसरे जहाज अमेरिकेच्या पाणबुडीने बुडविले

तर दुसरी इराणी युद्धनौका आयरीस देना ही अमेरिकेच्या पाणबुडीने टॉरपीडो हल्ला करून बुडवली. हा हल्ला श्रीलंकेजवळ समुद्रात झाला. या हल्ल्यात सुमारे ८७ इराणी नौसैनिकांचा मृत्यू झाला. ही युद्धनौका याआधी भारतात झालेल्या दोन मोठ्या नौदल कार्यक्रमांमध्ये सहभागी झाली होती. तसेच तिसरे जहाज आरिस बुशहरला इंजिनमध्ये बिघाड झाल्यामुळे त्रिंकोमाली बंदर येथे थांबण्याची परवानगी देण्यात आली. थोडक्यात म्हणजे इराणच्या जहाजांना भारताने मानवतेच्या कारणांमुळे बंदरात थांबण्याची परवानगी दिली, पण अमेरिकेने एक इराणी युद्धनौका बुडवल्यामुळे भारतीय महासागर परिसरात तणाव वाढला आहे.

जयशंकर यांनी सांगितले की, भारताने मानवतेच्या दृष्टिकोनातून ही परवानगी दिली. इराणच्या परराष्ट्र मंत्र्यांनी त्यासाठी भारताचे आभार मानले.

ऊर्जा सुरक्षेबद्दल चिंता

पश्चिम आशियातील संघर्षामुळे जागतिक तेल व ऊर्जा पुरवठ्यावर परिणाम होण्याची शक्यता आहे. त्यामुळे भारत सरकार ऊर्जा सुरक्षा कायम ठेवण्यासाठी प्रयत्न करत आहे. भारतीय ग्राहकांच्या हिताला प्राधान्य दिले जाईल.

संघर्षामुळे तेल, ऊर्जेच्या किमती वाढताहेत

ते म्हणाले की, वाढत्या संघर्षामुळे तेल, ऊर्जेच्या किमती वाढत आहेत, परंतु भारताच्या नागरिकांवर लक्षणीय परिणाम न होता त्याच्या ऊर्जेच्या गरजा पूर्ण व्हाव्यात यासाठी सरकार काम करत आहे. ते म्हणाले की भारतासाठी ऊर्जा सुरक्षा, व्यापार आणि राष्ट्रीय हितसंबंध हे अत्यंत महत्त्वाचे आहेत.

मध्य पूर्वेतून ६७ हजार नागरिक परतले - जयशंकर

परराष्ट्र मंत्री एस. जयशंकर म्हणाले की, मध्य पूर्वेतील सुरू असलेला संघर्ष लवकरच संपावा आणि सर्व देशांनी संवाद आणि राजनैतिकतेच्या मार्गावर परत यावे, अशी भारताची इच्छा आहे. त्यांनी सोमवारी संसदेच्या राज्यसभेत या मुद्द्यावर निवेदन दिले. जयशंकर म्हणाले की, या भागात राहणाऱ्या भारतीय नागरिकांची सुरक्षा ही सध्या सरकारची सर्वोच्च प्राथमिकता आहे. भारत तेथील सरकारांशी जवळून संपर्कात आहे आणि परिस्थितीवर बारकाईने लक्ष ठेवून आहे.

दुबईतून ३३० इस्रायली नागरिकांना बाहेर काढले

दुबईहून ३३० इस्रायली नागरिकांना घेऊन जाणारे पहिले बचाव विमान बेन गुरियन विमानतळावर सुरक्षितपणे उतरले आहे. त्यानंतर आणखी ३३० प्रवाशांना घेऊन जाणारे आणखी एक बोईंग विमान येईल. इराणसोबत सुरू असलेल्या युद्धामुळे एका आठवड्यापेक्षा जास्त काळ युएईमध्ये अडकलेल्या इस्रायली नागरिकांना घेऊन आणखी एक बचाव विमान सोमवारी दुबईहून अथेन्ससाठी रवाना होईल.

भारतीयांसाठी सूचना

भारतीय दूतावासांनी इस्रायल, इराण, यूएई, बहरीन, कतार, कुवैत, सौदी अरेबिया या देशांत राहणाऱ्या भारतीयांसाठी सूचना जारी केल्या.