तेहरान/वॉशिंग्टन : इराण आणि इस्त्रायल-अमेरिका यांच्यात सुरू असलेल्या युद्धाला सहा आठवडे पूर्ण होत असतानाच आता या संघर्षाने अत्यंत गंभीर वळण घेतले आहे. शुक्रवारी इराणने अमेरिकेचे एक 'एफ-१५ ई स्ट्राईक ईगल' लढाऊ विमान पाडल्याचा दावा केला असून, या विमानातील एका बेपत्ता वैमानिकाचा शोध घेण्यासाठी अमेरिकन लष्कराने शनिवारी नैऋत्य इराणच्या दुर्गम भागात मोठी शोधमोहीम राबवली, तर दुसरीकडे इराणने आपल्या नागरिकांना 'शत्रूच्या वैमानिकाला' पकडून देण्याचे आवाहन केले असून त्यासाठी बक्षीस जाहीर केले आहे.
इराणसोबत सुरू असलेल्या संघर्षात अमेरिकेची दोन लष्करी विमाने पाडण्यात इराणला यश आले आहे. गेल्या २० वर्षांहून अधिक काळातील अमेरिकेसाठी हा मोठा लष्करी धक्का मानला जात आहे. अमेरिकेचे अध्यक्ष डोनाल्ड ट्रम्प यांनी इराणची शक्ती 'पूर्णपणे नष्ट' झाल्याचा दावा केला असतानाच, इराणने आपल्या बचावात्मक क्षमतेचे दर्शन घडवले आहे.
मिळालेल्या माहितीनुसार, शुक्रवारी इराणने अमेरिकेचे एफ-१५ ई स्ट्राईक ईगल हे लढाऊ विमान पाडले. या विमानातील एका जवानाला वाचवण्यात यश आले असून दुसऱ्याचा शोध अद्याप सुरू आहे. याशिवाय, अमेरिकेचे ए-१० अटॅक एअरक्राफ्टही इराणच्या संरक्षण दलांच्या हल्ल्यात कोसळल्याचे इराणच्या सरकारी प्रसारमाध्यमांनी म्हटले आहे.
ओरॅकलच्या मुख्यालयावर ड्रोन हल्ला
इराणच्या रिव्होल्युशनरी गार्ड्सने अमेरिकन तंत्रज्ञान कंपन्यांना 'हेरगिरी' केल्याच्या आरोपावरून लक्ष्य करण्याची धमकी दिली होती. या पार्श्वभूमीवर शनिवारी दुबईतील 'ओरॅकल' कंपनीच्या मुख्यालयावर इराणने ड्रोन हल्ला केला. दुबई प्रशासनाने हा किरकोळ अपघात असल्याचे म्हटले असले, तरी इमारतीचे मोठे नुकसान झाले आहे. यापूर्वी अॅमेझॉनच्या वेब सर्व्हिसेसवरही अशाच प्रकारचे हल्ले झाले आहेत.