संध्याकाळ झाली की मुलांना काहीतरी चटपटीत आणि वेगळं खाण्याची इच्छा होते. कधी पिझ्झा, तर कधी बर्गर खाण्याचा हट्ट सुरू होतो. अशा वेळी रोज बाहेरून पदार्थ मागवणं खिशाला परवडत नाही. शिवाय घरात पिझ्झा बेस नसेल, तर मुलांसाठी झटपट पिझ्झा कसा बनवायचा, असा प्रश्न पडतो. पण आता यासाठी बाजारातून पिझ्झा बेस आणण्याची किंवा घरी पीठ मळण्याची गरज नाही.
आपल्या घरात नेहमी असणाऱ्या साध्या पावापासूनही अगदी कॅफेमध्ये मिळतो तसा चविष्ट पिझ्झा तयार करता येतो. त्यासाठी फार साहित्य किंवा जास्त वेळही लागत नाही. रंगीबेरंगी भाज्या, चीज आणि थोडेसे मसाले वापरून अवघ्या १० मिनिटांत स्वादिष्ट मिनी पाव पिझ्झा बनवता येतो. मुलांच्या डब्यासाठी, संध्याकाळच्या नाश्त्यासाठी किंवा अचानक पाहुणे आल्यावर हा पदार्थ उत्तम पर्याय ठरू शकतो. चला तर मग, घरच्या घरी पाव पिझ्झा कसा बनवायचा ते जाणून घेऊया.
पाव पिझ्झा बनवण्यासाठी लागणारे साहित्य
पाव - १ लादी
तेल - १ चमचा
कांदा-लसूण मसाला - १ चमचा
हिरवी शिमला मिरची - १ कप बारीक चिरलेली
गाजर - १ कप बारीक चिरलेले
लाल आणि पिवळी शिमला मिरची - १ कप बारीक चिरलेली
मेयोनिज - २ चमचे
टोमॅटो सॉस - १ चमचा
मोझरेला किंवा प्रोसेस्ड चीज - आवडीनुसार
ऑरिगॅनो - चवीनुसार
चिली फ्लेक्स - चवीनुसार
कोथिंबीर - थोडीशी बारीक चिरलेली
पाव पिझ्झा बनवण्याची सोपी कृती
१. सर्वप्रथम भाज्यांचे मिश्रण तयार करा
गॅसवर पॅन ठेवून त्यात एक चमचा तेल गरम करा. तेल गरम झाल्यावर कांदा-लसूण मसाला घालून थोडा परता. त्यानंतर बारीक चिरलेली हिरवी, लाल आणि पिवळी शिमला मिरची तसेच गाजर घाला. सर्व भाज्या एकत्र करून काही मिनिटे हलक्या आचेवर परतून घ्या.
२. भाज्यांना द्या क्रीमी आणि चटपटीत चव
भाज्या थोड्या मऊ झाल्यानंतर त्यात मेयोनिज आणि टोमॅटो सॉस घाला. सर्व साहित्य व्यवस्थित एकत्र करा. यामुळे भाज्यांच्या मिश्रणाला क्रीमी आणि आंबट-गोड चव मिळेल. मिश्रण तयार झाल्यावर गॅस बंद करा आणि ते थोडे थंड होऊ द्या.
३. साध्या पावापासून बनवा पिझ्झाचा बेस
आता पावाची लादी घ्या. सुरीच्या मदतीने पाव मधोमध कापून उघडा किंवा वरच्या बाजूला थोडी जागा तयार करा. त्यामुळे त्यावर भाज्यांचे मिश्रण सहज पसरवता येईल. तयार केलेले मिश्रण पावावर व्यवस्थित लावा.
४. वरून चीज आणि मसाले घाला
भाज्यांचे मिश्रण लावल्यानंतर त्यावर आवडीनुसार किसलेले मोझरेला किंवा प्रोसेस्ड चीज घाला. त्यानंतर थोडे ऑरिगॅनो आणि चिली फ्लेक्स भुरभुरा. लहान मुलांसाठी बनवत असाल, तर चिली फ्लेक्सचे प्रमाण कमी ठेवू शकता.
५. पाव पिझ्झा शेकून घ्या
तयार केलेला पाव पिझ्झा ओव्हनमध्ये ठेवून चीज वितळेपर्यंत गरम करा. घरात ओव्हन नसेल, तरी काळजी करण्याची गरज नाही. जाड बुडाच्या पॅनमध्ये पाव ठेवून झाकण लावा आणि मंद आचेवर काही मिनिटे गरम करा. चीज वितळल्यावर आणि पावाचा खालचा भाग हलका कुरकुरीत झाल्यावर गॅस बंद करा.
६. गरमागरम पाव पिझ्झा सर्व्ह करा
तयार पाव पिझ्झावर थोडी बारीक चिरलेली कोथिंबीर भुरभुरा. त्याचे छोटे तुकडे करून टोमॅटो सॉससोबत सर्व्ह करा. मऊ पाव, रंगीबेरंगी भाज्या आणि वितळलेल्या चीजमुळे हा पदार्थ लहानांपासून मोठ्यांपर्यंत सर्वांनाच आवडू शकतो.
पाव पिझ्झा बनवताना या टिप्स लक्षात ठेवा
पाव पिझ्झा अधिक चविष्ट बनवण्यासाठी भाज्या जास्त शिजवू नका. त्यामुळे त्यांचा हलका कुरकुरीतपणा टिकून राहील. पावावर खूप जास्त सॉस किंवा ओलसर मिश्रण लावू नका, अन्यथा पाव मऊ पडू शकतो. चीज वितळवताना गॅसची आच कमी ठेवा, जेणेकरून पाव खालून करपणार नाही.
सर्व साहित्य आधीच तयार असेल, तर हा नाश्ता साधारण १० मिनिटांत बनवता येऊ शकतो. मुलांना आवडणाऱ्या इतर भाज्यांचाही यात समावेश करता येईल. त्यामुळे पुढच्या वेळी मुलांनी पिझ्झा खाण्याचा हट्ट केला, तर महागडा पिझ्झा मागवण्याऐवजी घरच्या घरी हा सोपा आणि चविष्ट पाव पिझ्झा नक्की करून पाहा.