भारताच्या लोकप्रिय स्ट्रीट फूड्समध्ये वडापाव आणि पाणीपुरीचे नाव नेहमीच घेतले जाते, पण जगातील ५० बेस्ट स्ट्रीट फूड्सच्या यादीत भारताच्या तीन इतर लोकप्रिय पदार्थांनी स्थान मिळवले आहे. टेस्टअटलस या प्रसिद्ध ऑनलाइन फूड गाईडने ही यादी जाहीर केली आहे. या यादीत भारतीय पदार्थ, विशेषतः परोठा, कुल्चा आणि छोले भटूरे या तीन पदार्थांना वरचे स्थान दिले गेले आहे.
परोठा हा दक्षिण भारतीय पदार्थ आहे जो की स्वादीष्ट आणि पोषणयुक्त आहे. तर उत्तर भारतातील अमृतसरी कुल्चा आणि छोले भटूरेही या यादीत समावीष्ट केले आहेत. त्यामुळे आता या पदार्थांना जागातील टॉप ५० स्ट्रीट फूड्सच्या यादीत स्थान मिळाले आहे.
या यादीत पाचव्या स्थानावरील असलेला आणि क्रिस्पी लेयर्स असलेला परोठा हा अत्यंत चवदार दक्षिण भारतीय पदार्थ आहे, तमिळनाडू आणि केरळमधील गल्ल्यांमध्ये तो मोठ्या प्रमाणात विकला जातो. परोठा फक्त स्ट्रीट फूड नसून तो दक्षिण भारतातील एक मुख्य खाद्यपदार्थ देखील आहे. दक्षिण भारतात परोठा साधारणतः चिकन किंवा मटण करीसोबत खाल्ला जाते. आता त्याला जागतिक स्तरावर स्थान मिळाले आहे.
सातव्या स्थानावर असलेला अमृतसरी कुल्चा हा उत्तर भारतातील आतिथ्याचा एक चवदार पदार्थ आहे. तंदूरमध्ये भाजलेले खमंग कुल्चा भारतातील अनेक लोकांचा आवडता पदार्थ आहे. याच्या प्रत्येक तुकड्यात अप्रतिम चव आहे. गोल्डन टेम्पलच्या स्वयंपाकघरांतून या पदार्थाची सुरुवात झाली आहे. कुल्चा हा फक्त स्ट्रीट फूड नाही, तर पंजाबच्या लोकांचा सर्वात जास्त आवडीचा एक खाद्यपदार्थही आहे.
या यादीत चाळीसव्या स्थानावर असलेला छोले भटूरे हा पदार्थ उत्तर भारतातील एक प्रसिद्ध स्ट्रीटफूड म्हणून ओळखला जातो. नाश्त्यासाठी आवडता पदार्थ असलेला हा पदार्थ चवीला अप्रतीम आहे. मऊ आणि फुगीर भटूरे, मसालेदार आणि तिखट छोले यामूळे याची चव जीभेवर रेंगाळते. राजधानी दिल्लीमध्ये या पदार्थाची लोकप्रियता जास्त प्रमाणात असून ऑफिस कॅंटीनपासून ते रस्त्यांवरच्या ढाब्यांपर्यंत सर्वच ठिकाणी हा पदार्थ विकला जातो.
जगातील नंबर १ स्ट्रीट फूड कोणते आहे?
भारताच्या या तीन चवदार पदार्थांनी या यादीत स्थान मिळवले आहेच, पण या यादीत जगातील नंबर १ चे स्थान गाठले आहे ते 'गारंटिता' या अल्जीरियाच्या एका पदार्थांने, तसेच या यादीत आशियातील चायनीज, इंडोनेशियन सिओमाय, मेक्सिकोचे चीज आणि मांसयुक्त क्युसेबिर्रिया या चवदार पदार्थांचा समावेश आहे.