स्वच्छ, नितळ आणि सुंदर त्वचा असावी, ही प्रत्येकाचीच इच्छा असते. मात्र नाकावर दिसणारे काळे डाग म्हणजेच ब्लॅकहेड्सची समस्या अनेकांच्या सौंदर्यावर विरजण घालते. चेहरा कितीही नीट स्वच्छ ठेवला तरी नाकावरील ब्लॅकहेड्स सहज लक्ष वेधून घेतात. विशेषतः तरुणांमध्ये आणि ऑइली स्किन असलेल्या व्यक्तींमध्ये ही समस्या जास्त प्रमाणात दिसून येते. पण काळजी करू नका! काही सोपे, घरगुती उपाय नियमितपणे केल्यास ब्लॅकहेड्सचा त्रास नक्कीच कमी करता येतो.
ब्लॅकहेड्स म्हणजे नेमकं काय?
ब्लॅकहेड्स म्हणजे त्वचेतील रोमछिद्रांमध्ये साचलेले अतिरिक्त तेल, धूळ, माती आणि मृत त्वचेच्या पेशी. हे घटक हवेशी संपर्कात आल्यावर ऑक्सिडाइझ होतात आणि त्यामुळे ते काळसर दिसू लागतात. नाकावर रोमछिद्रं तुलनेने मोठी असल्यामुळे तिथे ब्लॅकहेड्स जास्त प्रमाणात तयार होतात. वेळेवर काळजी घेतली नाही, तर हे ब्लॅकहेड्स वाढून त्वचेचा पोत बिघडवू शकतात.
ब्लॅकहेड्स का होतात?
त्वचेतील अतिरिक्त तेलस्राव, चेहऱ्याची योग्य साफसफाई न करणे, मेकअप नीट न काढणे, हार्मोनल बदल तसेच प्रदूषण यामुळे ब्लॅकहेड्सचा त्रास वाढतो. सतत हाताने नाकाला स्पर्श करणे किंवा ब्लॅकहेड्स दाबून काढण्याचा प्रयत्न करणेही त्वचेसाठी घातक ठरू शकतो.
ब्लॅकहेड्स कमी करण्यासाठी घरगुती उपाय
ब्लॅकहेड्स कमी करण्यासाठी वाफ घेणं हा एक सोपा आणि प्रभावी उपाय आहे. गरम पाण्याची वाफ चेहऱ्यावर घेतल्यास रोमछिद्रं उघडतात आणि आत साचलेली घाण बाहेर येण्यास मदत होते. वाफ घेतल्यानंतर लाइट स्क्रबने नाक हलक्या हाताने स्वच्छ केल्यास ब्लॅकहेड्स हळूहळू कमी होतात. हा उपाय आठवड्यातून एक ते दोन वेळा करावा.
बेकिंग सोडा आणि गुलाब पाणी किंवा साधं पाणी यांची एकत्र पेस्ट तयार करून नाकावर हलक्या हाताने मसाज केल्यास त्वचेवरील मृत पेशी निघून जातात आणि रोमछिद्र स्वच्छ होतात. मात्र बेकिंग सोडा जास्त वेळ किंवा वारंवार वापरू नये, कारण त्यामुळे त्वचा कोरडी होऊ शकते. आठवड्यातून एकदाच हा उपाय पुरेसा ठरतो.
मलई (साय) आणि हळद यांचे मिश्रणही ब्लॅकहेड्ससाठी फायदेशीर ठरते. मलई त्वचेला पोषण देते, तर हळदीतील अँटीबॅक्टेरियल गुणधर्म त्वचा स्वच्छ ठेवण्यास मदत करतात. हे मिश्रण नाकावर लावून १० ते १५ मिनिटांनी धुतल्यास त्वचा मऊ होते आणि ब्लॅकहेड्स कमी होण्यास मदत मिळते.
चारकोल पॅक नाकावरील ब्लॅकहेड्स कमी करण्यासाठी प्रभावी मानला जातो. अॅक्टिव्हेटेड चारकोल त्वचेतील खोलवर साचलेली घाण, अतिरिक्त तेल आणि टॉक्सिन्स शोषून घेतो. चारकोल पॅक नाकावर किंवा टी-झोन भागावर लावल्यास रोमछिद्र स्वच्छ होण्यास मदत होते आणि ब्लॅकहेड्स हळूहळू कमी होतात. पॅक १० ते १५ मिनिटे सुकू द्यावा आणि नंतर कोमट पाण्याने हलक्या हाताने धुवावा. आठवड्यातून एकदाच चारकोल पॅक वापरणे योग्य ठरते. नियमित वापरामुळे त्वचा स्वच्छ, तजेलदार आणि अधिक नितळ दिसू लागते.
नाकावरील ब्लॅकहेड्स टाळण्यासाठी दररोज किमान दोन वेळा चेहरा स्वच्छ धुणे, ऑइली स्किनसाठी योग्य फेसवॉश वापरणे, अति मेकअप टाळणे आणि भरपूर पाणी पिणे गरजेचे आहे. ब्लॅकहेड्स हाताने दाबून काढण्यापेक्षा नियमित काळजी घेणे अधिक सुरक्षित ठरते.
नाकावरील ब्लॅकहेड्स ही कायमची समस्या नाही. योग्य स्वच्छता, नियमित घरगुती उपाय आणि थोडीशी काळजी घेतल्यास त्वचा नितळ, स्वच्छ आणि आकर्षक दिसू शकते. महागड्या उपचारांपेक्षा नैसर्गिक उपाय अधिक सुरक्षित आणि परिणामकारक ठरतात.
(Disclaimer: या लेखात दिलेली माहिती सामान्य मार्गदर्शनासाठी आहे. याची ‘नवशक्ति’ पुष्टी करत नाही.)