फुलं आपल्या आयुष्याचा अविभाज्य भाग आहेत. त्यांच्या मोहक रंगांमुळे आणि मंद सुगंधामुळे मन ताजं होतं. पण तुम्हाला माहीत आहे का? केवळ सजावटीपुरते नाही, तर आरोग्य आणि सौंदर्य खुलवण्यासाठीदेखील गुलाब हे एक अद्भुत नैसर्गिक वरदान आहे. सुगंध, सौंदर्य आणि शांती या तिन्हींचा परिपूर्ण संगम म्हणजे गुलाब. त्यातील अँटिऑक्सिडंट्स, व्हिटॅमिन C, व्हिटॅमिन E, आणि नैसर्गिक मॉइश्चरायझिंग घटक त्वचा आणि केस दोन्हींच्या आरोग्यासाठी अत्यंत फायदेशीर आहेत.

गुलाबपाणी : त्वचेसाठी नैसर्गिक टॉनिक

गुलाबाच्या पाकळ्यांपासून तयार होणारं गुलाबपाणी केवळ सुगंधीच नाही, तर त्वचेचं नैसर्गिक संतुलन राखणारं ‘स्किन टॉनर’ आहे.

• हे त्वचेला हायड्रेट करतं आणि ओलावा टिकवून ठेवतं.

• चेहऱ्यावरील दाह, लालसरपणा आणि थकवा कमी करण्यास मदत करतं.

• नियमित वापर केल्यास त्वचा मऊ, सतेज आणि तजेलदार होते.

• उन्हात किंवा प्रदूषणात जास्त वेळ राहिल्यानंतर गुलाबपाण्याचा स्प्रे चेहऱ्यावर केल्यास त्वरित refreshing glow मिळतो.

DIY टॉनर टिप:
गुलाबपाण्यात थोडे ग्लिसरीन आणि लिंबाचा रस मिसळून कापसाने चेहऱ्यावर लावा. त्वचेला नैसर्गिक चमक मिळेल.

केसांसाठी गुलाबपाण्याचे जादूई फायदे

अनेकांना हे माहीत नसतं की गुलाबपाणी केवळ चेहऱ्यासाठी नाही, तर केसांसाठीही अमृतासमान आहे. ब्यूटी एक्सपर्ट अमित सरदा यांच्या मते, गुलाबातील व्हिटॅमिन्स, मिनरल्स आणि इसेंशियल ऑइल्स टाळूचं पीएच संतुलन राखतात आणि केसांच्या मुळांना मजबुती देतात.

कसे वापरावे :

१. निस्तेज केसांसाठी

वारंवार कर्लिंग आयर्न किंवा ब्लो ड्रायर वापरल्याने केस शुष्क व कमजोर होतात. अशावेळी जोजोबा ऑइलमध्ये गुलाबपाणी मिसळा आणि टाळूवर हलका मसाज करा.
१० मिनिटांनी कोमट पाण्याने केस धुवा. हा उपाय केसांना पुन्हा सतेज करतो आणि नुकसान कमी करतो.

२. फ्रिझी केसांसाठी

फ्रिझी केस म्हणजे प्रत्येक महिलेला भेडसावणारी समस्या! गुलाबपाण्यात कोरफडीचा गर (अलोवेरा जेल) मिसळा आणि टाळूवर लावा. ३० मिनिटांनी केस धुवा. यामुळे केसांना नैसर्गिक मऊपणा, चमक आणि ओलावा मिळतो.

बोनस टिप : गुलाब फेस मिस्ट

गुलाबपाण्यात काही थेंब टी ट्री ऑईल आणि व्हिटॅमिन E कॅप्सूल मिसळा. फ्रिजमध्ये ठेवा आणि दररोज चेहऱ्यावर स्प्रे करा. हे त्वचेतील थकवा, कोरडेपणा आणि पिंपल्सपासून संरक्षण देईल.

गुलाब फक्त दिसायला सुंदर नसून, तो त्वचा आणि केसांना निसर्गाने दिलेली जादू आहे.
दररोजच्या सौंदर्य दिनचर्येत गुलाबपाण्याचा वापर केल्यास तुम्हाला तजेलदार त्वचा, मजबूत केस आणि दिवसभर ताजेपणा यांचा अनुभव नक्कीच मिळेल.