उन्हाळा म्हटलं की आंबा आणि आंबा म्हटलं की त्यापासून बनणारे चविष्ट पदार्थ… सध्या बाजारात आंब्यांची रेलचेल पाहायला मिळते आहे. आंब्याचा रस, शेक, आमरस हे पदार्थ आपण नेहमीच खातो, पण याच आंब्यापासून बनणारं एक खास आणि हटके पेय म्हणजे ‘मँगो मस्तानी’. पुण्यात विशेष लोकप्रिय असलेलं हे थंडगार पेय एकदा चाखलं की पुन्हा पुन्हा खावंसं वाटतं.
मँगो मस्तानी हे आंब्याचा रस, आईस्क्रिम आणि सुकामेवा यांचं परफेक्ट कॉम्बिनेशन आहे. बाहेर हे पेय थोडं महाग मिळत असलं, तरी अगदी कमी साहित्य वापरून तुम्ही ते घरच्या घरी सहज तयार करू शकता.
साहित्य
१ मोठा पिकलेला आंबा
२ स्कूप व्हॅनिला किंवा मँगो आईस्क्रिम
१–२ टेबलस्पून टुटी फ्रुटी
काजू, बदाम, पिस्ता (ड्रायफ्रुट्स)
थोडं दूध
बर्फ
कृती
सर्वप्रथम आंबा स्वच्छ धुवून त्याचा गर काढा. अर्ध्या आंब्याचा गर, थोडं दूध आणि बर्फ घालून मिक्सरमध्ये फिरवून गुळगुळीत रस तयार करा. उरलेल्या आंब्याचे छोटे तुकडे करून ठेवा.
आता एक उंच ग्लास घ्या. सर्वात खाली आंब्याच्या रसाचा थर लावा. त्यावर आईस्क्रिमचा एक स्कूप घाला. पुन्हा आंब्याचा रस घालून थर तयार करा. वरून आंब्याचे तुकडे, टुटी फ्रुटी आणि ड्रायफ्रुट्स टाका.
असं थर देत तयार केलेली ही गारगार मँगो मस्तानी लगेच सर्व्ह करा. उन्हाळ्यात पाहुण्यांसाठी किंवा कुटुंबासोबत एन्जॉय करण्यासाठी ही एक परफेक्ट डिश ठरते.