रत्नागिरी: चिपळूण शहरातील चिंचनाका परिसरात महाकाय मगर आढळल्यानं खळबळ उडाली. रविवारी रात्री ८ वाजता चिंचनाका परिसरातील रस्त्यामध्ये महाकाय मगरीचं दर्शन झालं. चिपळूण शहरातून वाहणाऱ्या शिव नदीत मगरींचा मोठ्या प्रमाणात वावर असतो. आता या मगरी थेट नागरी वस्तींजवळील रस्त्यांवर आढळून आल्यानं नागरिकांमध्ये भीतीचं वातावरण पसरलं आहे. चिपळूणमधील रस्त्यांवर आलेल्या या मगरीचा व्हिडिओ सध्या सोशल मीडियावर चांगलाच व्हायरल होत आहे.

नागरी वस्तीत मगरींच्या वावर-

दरम्यान या घटनेमुळं चिपळूण शहरातील मगरींच्या वावराचा प्रश्न पुन्हा ऐरणीवर आला आहे. चिपळूण शहरातून वाहणाऱ्या वशिष्ठी तसेच शिव नदीत मगरींचा वावर प्रचंड आहे. खासकरून पावसाळ्यात अनेकदा या मगरी शहरात मानवी वस्तीमध्ये वावरताना दिसून येतात. यापूर्वी शहरातील गोवळकोट भागात मगर आढळून आली होती. त्यानंतर आता चिंचनाका परिसरातील मुख्य रस्त्यावर मगर आढळल्यानं नागरिकांध्ये घबराट निर्माण झाली आहे. नागरी वस्तीत मगरींच्या वावरामुळं नागरीक चिंतेत आहेत. प्रशासनानं मगरी नदीपात्र सोडून शहरात पोहोचणार नाहीत याची काळजी घेण्यासाठी कार्यवाही करण्याची मागणी देखील होतं आहे.

मगरीचा व्हि़डिओ होतोय व्हायरल...

रविवारी रात्री चिंचनाका परिसरात महाकाय रस्त्यावर दिसून आली. ही मगर पाहून रस्त्यावरून जाणाऱ्या वाहन चालकांची पुरती तारांबळ उडाली. प्रत्यक्षदर्शींनी मगरीचा रस्त्यावरील व्हिडीओ फोनमध्ये चित्रित केला. या व्हिडिओमध्ये एका डांबरी रस्त्यावर एक महाकाय मगर बिनधास्तपणे येताना दिसत आहे. हा व्हिडिओ सोश मीडियावर व्हायरल झाला आहे.