मुंबई : महाराष्ट्र राज्य मार्ग परिवहन (एसटी) महामंडळातील लिपिक-टंकलेखक पदांच्या खात्यांतर्गत पदोन्नती प्रक्रियेत गंभीर अनियमितता झाल्याचा आरोप महाराष्ट्र एसटी कर्मचारी काँग्रेसने केला आहे. कर्मचाऱ्यांच्या भवितव्याशी खेळणाऱ्या अधिकाऱ्यांवर कारवाई करण्याची मागणीही संघटनेने केली आहे.
एसटी महामंडळातील चालक, वाहक, शिपाई, सहाय्यक आदी तत्सम पदातील कर्मचाऱ्यांसाठी राखीव असलेल्या २५ टक्के पदांवरील पदोन्नती प्रक्रियेत काही विभागांत भ्रष्टाचाराच्या हेतूने गेली तीन, चार वर्षे प्रक्रिया स्थगित ठेवण्यात आल्याचा आरोप संघटनेचे सरचिटणीस श्रीरंग बरगे यांनी केला आहे. काही ठिकाणी ज्येष्ठता डावलून, तर काही ठिकाणी नावातील बदलाचे कारण देत नियमबाह्य पद्धतीने कनिष्ठ कर्मचाऱ्यांना पात्र ठरविण्यात आल्याचा दावाही त्यांनी केला.
बरगे यांच्या म्हणण्यानुसार, ही प्रक्रिया प्रत्येक वर्षी राबविण्यात आली पाहिजे. कारण प्रत्येक वर्षी रिक्त होणाऱ्या सरळ सेवा भरती मधून २५ टक्के पदे सेवेतील कर्मचाऱ्यामधून भरण्याचे परिपत्रक असून गेली दोन, तीन वर्षे ही प्रक्रिया रखडल्याने अनेक कर्मचारी या पदोन्नती पासून वंचित राहिले आहेत. अशातच गंभीर प्रकरणी एका विभागातील खात्यांतर्गत चौकशीत समितीतील तीन अधिकाऱ्यांवर समान स्वरूपाचे आरोप करण्यात आले होते.