उल्हासनगर : राष्ट्रवादी काँग्रेसचे आमदार एकनाथ खडसे यांच्या ‘मुक्ताई’ या जळगावातील बंगल्यात झालेल्या थरारक चोरी प्रकरणाचा तपास आता उल्हासनगरकडे वळला आहे. या प्रकरणात पोलिसांनी उल्हासनगरातील दोन जणांना अटक करून सुमारे ६ लाख २१ हजार रुपयांचा सोने-चांदीचा मुद्देमाल हस्तगत केला आहे, तर मुख्य तीन आरोपी अद्याप फरार असून, पोलिसांचे विशेष पथक त्यांचा शोध घेत आहे.
जळगावातील शिवराम नगर परिसरातील खडसे यांच्या बंगल्यात झालेल्या घरफोडीनंतर चोरीचा तपास हाती घेतलेल्या जळगाव पोलिसांना तांत्रिक पुरावे आणि मोबाईल लोकेशनच्या आधारे या घटनेचे सूत्रधार उल्हासनगरातील असल्याचे निष्पन्न झाले होते. विशेष पथक उल्हासनगरात दाखल झाले आणि विठ्ठलवाडी पोलिसांसोबत संयुक्त मोहीम हाती घेण्यात आली. या मोहिमेत उघड झाले की, चोरीनंतर आरोपींनी घरातील सोने-चांदीचे दागिने उल्हासनगरात चिराग सय्यद या व्यक्तीकडे सुपूर्द केले होते.