पुणे : पुण्याहून गुवाहाटीला जाणाऱ्या इंडिगोच्या विमानात उड्डाणानंतर काही वेळातच तांत्रिक बिघाड झाल्याची घटना रविवारी (दि. १५) सकाळी घडली. विमानाचे लँडिंग गिअर टेकऑफनंतर आत न गेल्याने विमान पुन्हा पुणे विमानतळावर परत आणण्यात आले. या घटनेमुळे विमानतळावर पूर्ण आपत्कालीन स्थिती (फुल इमर्जन्सी) घोषित करण्यात आली होती. विमानात प्रवासी आणि कर्मचाऱ्यांसह एकूण १९२ जण होते. सुदैवाने विमानाचे सुरक्षित लँडिंग झाले असून सर्वजण सुखरूप आहेत.

टेकऑफनंतर लँडिंग गिअर आत गेलेच नाही

माहितीनुसार, इंडिगोचे 6E 0623 (VT-IZE) हे विमान पुण्याहून गुवाहाटीच्या दिशेने रवाना झाले होते. मात्र, उड्डाणानंतर काही वेळातच विमानाच्या लँडिंग गिअरमध्ये तांत्रिक समस्या निर्माण झाली. विमानाचे लँडिंग गिअर म्हणजेच चाके आणि त्यांची यंत्रणा टेकऑफनंतर आत घडी होऊन गेली नाही. ती बाहेरच राहिल्याचे वैमानिकाच्या लक्षात आले. यानंतर वैमानिकाने तातडीने हवाई वाहतूक नियंत्रण कक्षाला (ATC) याची माहिती दिली.

पुणे विमानतळावर 'फुल इमर्जन्सी' घोषित

वैमानिकाकडून माहिती मिळताच पुणे विमानतळ प्रशासनाने एटीसी, इंडिगो आणि संबंधित यंत्रणांशी समन्वय साधला. विमानतळाचे व्यवस्थापन करणाऱ्या भारतीय हवाई दलाने (IAF) 'फुल इमर्जन्सी' घोषित केली. त्यानंतर आपत्कालीन परिस्थिती हाताळण्यासाठी आवश्यक प्रक्रिया सुरू करण्यात आल्या. अग्निशमन दलाची वाहने, रुग्णवाहिका आणि इतर बचाव पथके तातडीने सज्ज ठेवण्यात आली. विमानातील प्रवासी आणि कर्मचाऱ्यांच्या सुरक्षिततेसाठी सर्व खबरदारी घेण्यात आली.

धावपट्टीवर विमानाची तपासणी करून सुरक्षित लँडिंग

विमानाचे लँडिंग गिअर व्यवस्थित बाहेर आहे की नाही, याची खात्री करण्यासाठी खबरदारीचा उपाय म्हणून विमानाने धावपट्टीवरून कमी उंचीवरून एक फेरी मारली. यामुळे विमानाच्या चाकांची स्थिती प्रत्यक्ष पाहून तपासता आली. त्यानंतर सकाळी ९ वाजून ४ मिनिटांनी विमानाने पुणे विमानतळावर सुरक्षित लँडिंग केले. विमान धावपट्टीवर उतरल्यानंतर तीन अग्निशमन वाहनांसह दोन रुग्णवाहिकांनी त्याला बे क्रमांक ७ पर्यंत सोबत केली.

१९२ प्रवासी आणि कर्मचारी सुखरूप

विमान सुरक्षित स्थितीत असल्याची खात्री झाल्यानंतर सकाळी ९ वाजून १० मिनिटांनी एटीसीने फुल इमर्जन्सी मागे घेतली. त्यानंतर विमानाला एरोब्रिज जोडण्यात आला आणि सर्व प्रवासी व कर्मचाऱ्यांना सुरक्षितपणे खाली उतरवण्यात आले. विमानातील एकाही व्यक्तीला दुखापत झाली नसल्याचे विमानतळ प्रशासनाने स्पष्ट केले. या विमानात प्रवासी आणि कर्मचाऱ्यांसह एकूण १९२ जण होते.

गुवाहाटीला जाण्यासाठी पर्यायी विमानाची व्यवस्था

या घटनेमुळे गुवाहाटीला जाणाऱ्या प्रवाशांचा पुढील प्रवास खोळंबला. त्यामुळे इंडिगोकडून प्रवाशांना त्यांच्या इच्छित स्थळी पोहोचवण्यासाठी पर्यायी विमानाची व्यवस्था करण्यात येत आहे. हे विमान बंगळुरूहून पुण्यात आणण्याचे नियोजन असून, त्याद्वारे प्रवाशांचा गुवाहाटीपर्यंतचा पुढील प्रवास पूर्ण केला जाणार आहे.

(इंग्रजी बातमी वाचण्यासाठी येथे क्लिक करा.)