कराड : वन्यजीव संरक्षण कायदा शेड्युल–१ (भाग ई) मध्ये समाविष्ट असलेला तसेच आय.यू.सी.एन.कडून अत्यंत धोकादायक म्हणून घोषित करण्यात आलेला आणि रेड डाटा लिस्टमध्ये समाविष्ट असलेल्या ‘बो माऊथ गिटार’ (Bowmouth Guitar Fish) या दुर्मिळ माशाची कराड परिसरात शिकार केल्याचा प्रकार उघडकीस आला आहे.

या प्रकरणात कराड येथील अमीर दस्तगीर नदाफ (रा. मलकापूर, कराड) व सातारा येथील ओमकार राजेंद्र मिळवणे (रा. गुरुवार पेठ, सातारा) यांनी सदर माशाचा व्हिडीओ प्रसारित करून त्याचे प्रदर्शन केल्याची माहिती वन विभागाला गुप्त माहितीद्वारे मिळाली. त्यानंतर वन विभागाने तात्काळ कारवाई करत दोघांविरोधात गुन्हा दाखल करण्यात आला आहे.

ही कारवाई साताऱ्याचे उपवनसंरक्षक अमोल सातपुते यांच्या मार्गदर्शनाखाली करण्यात आली. या पथकात सहाय्यक वनसंरक्षक जयश्री जाधव, वनक्षेत्रपाल ललिता पाटील, वनक्षेत्रपाल संदीप जोपाळे, वनपाल आनंद जगताप, वनपाल सुनील शिंदे, वनरक्षक कैलास सानप, अभिजीत शेळके, अक्षय पाटील व मुकेश राऊळकर यांचा समावेश होता.

या प्रकरणाचा पुढील तपास वन विभागाकडून सुरू असून, दुर्मिळ व संरक्षित प्रजातींच्या शिकारीविरोधात कठोर कारवाई केली जाईल, असा इशारा वन विभागाने दिला आहे.