कर्जत : कर्जत-खोपोली रेल्वे स्थानकाजवळ मार्गावरील पळसदरी रेल्वे रूळ ओलांडताना मेल एक्स्प्रेसची धडक बसल्याने एका प्रवाशाचा मृत्यू झाला. ही घटना आज सकाळी घडली. याप्रकरणी कर्जत रेल्वे पोलीस ठाण्यात आकस्मिक मृत्यूची नोंद करण्यात आली आहे.
मृत प्रवाशाचे नाव सखाराम मारुती हिलम असे असून ते वासरे खोंडा परिसरातील शिरसे येथील आदिवासी वाडीतील रहिवासी होते. ते नेहमीप्रमाणे पळसदरी रेल्वे स्थानकावरून लोकलने खोपोली येथे नोकरीसाठी जात होते. खोपोलीकडे जाणारी लोकल पकडण्यासाठी ते रेल्वे रूळ ओलांडत असताना पुण्याकडून येणाऱ्या मेल एक्स्प्रेसची त्यांना धडक बसली.
ही दुर्घटना पळसदरी प्लॅटफॉर्मपासून सुमारे २०० मीटर अंतरावर घडली. धडकेनंतर हिलम गंभीर जखमी अवस्थेत रेल्वे रुळाजवळ पडले होते. घटनेची माहिती मिळताच कर्जत रेल्वे पोलिसांनी घटनास्थळी धाव घेतली आणि त्यांना तातडीने कर्जत उपजिल्हा रुग्णालयात दाखल केले.