पुणे : खंडाळा घाटातील दरड आणि मुसळधार पावसामुळे गेल्या तीन दिवसांपासून विस्कळीत झालेल्या मुंबई-पुणे रेल्वे मार्गावरील सेवेला अखेर दिलासा मिळाला आहे. मध्य रेल्वेने खंडाळा घाटातील एका मार्गावरील मलबा हटवल्यानंतर मुंबई-पुणे मार्गावर काही रेल्वेगाड्या पुन्हा धावू लागल्या असून, पूर्ण सेवा पूर्ववत करण्याचे काम अद्याप सुरू असल्याची माहिती रेल्वे प्रशासनाने दिली आहे.
तीव्र पावसामुळे रेल्वे वाहतूक ठप्प
सोमवारी (दि. ६) रात्री झालेल्या मुसळधार पावसामुळे लोणावळा आणि कर्जतदरम्यान सुमारे सहा ते सात ठिकाणी दरडी कोसळल्या. त्यामुळे मुंबई-पुणे रेल्वे मार्गावरील रेल्वे वाहतूक पूर्णपणे ठप्प झाली होती. सततचा पाऊस आणि जोरदार वाऱ्यामुळे रेल्वे सेवा पूर्ववत करण्याच्या कामात वारंवार अडथळे आले. प्रतिकूल परिस्थितीतही रेल्वे कर्मचाऱ्यांनी युद्धपातळीवर काम सुरू ठेवले.
'इंद्रायणी एक्स्प्रेस'सह काही गाड्या पुन्हा धावल्या
प्रभावित मार्गावरील एका रेल्वे रुळावरील मलबा हटविल्यानंतर रेल्वे सेवा हळूहळू सुरू करण्यात आली. मुंबईहून पुण्याकडे जाणाऱ्या इंद्रायणी एक्स्प्रेस, पुणे इंटरसिटी एक्स्प्रेस तसेच अन्य दोन लांब पल्ल्याच्या एक्स्प्रेस गाड्या पुन्हा मार्गस्थ करण्यात आल्या. त्यामुळे अडकलेल्या हजारो प्रवाशांना दिलासा मिळाला आहे. मात्र, सर्व मार्ग सुरक्षित घोषित झाल्यानंतरच पूर्ण क्षमतेने रेल्वे सेवा सुरू करण्यात येणार असल्याचे रेल्वे प्रशासनाने स्पष्ट केले आहे.
खंडाळा स्थानकाजवळ पुन्हा दरड
दरम्यान, दुरुस्तीच्या कामादरम्यान बुधवारी सकाळी खंडाळा रेल्वे स्थानकाजवळ पुन्हा एकदा दरड कोसळल्याने प्रशासनाची चिंता वाढली आहे. घाटातील संवेदनशील भागांवर रेल्वे प्रशासनाकडून सातत्याने लक्ष ठेवण्यात येत असून परिस्थितीवर बारकाईने नजर ठेवली जात आहे.
'मिसिंग लिंक' प्रकल्पालाही फटका
मुसळधार पावसाचा फटका राज्याच्या महत्त्वाकांक्षी मुंबई-पुणे द्रुतगती मार्गावरील 'मिसिंग लिंक' प्रकल्पालाही बसला. सोमवारी सकाळी पहिल्या बोगद्याकडे जाणाऱ्या मार्गावर मोठी दरड कोसळून मोठमोठे दगड, माती आणि काँक्रीटची सुरक्षा भिंत रस्त्यावर कोसळली. त्यामुळे नव्याने उभारलेल्या मार्गावरील वाहतूक तातडीने बंद करण्यात आली होती.
१२ तासांच्या प्रयत्नांनंतर मार्ग मोकळा
सततच्या पावसातही अभियंते, आपत्कालीन पथके आणि जड यंत्रसामग्रीच्या मदतीने जवळपास १२ तास अखंड काम करून रस्त्यावरील मलबा हटविण्यात आला आणि मार्ग पूर्ववत करण्यात आला.
प्रवासापूर्वी अद्ययावत माहिती तपासण्याचे आवाहन
घाट परिसरात अधूनमधून सुरू असलेल्या पावसामुळे पुन्हा दरड कोसळण्याचा धोका कायम असल्याने मुंबई-पुणे दरम्यान प्रवास करणाऱ्या नागरिकांनी रेल्वे आणि वाहतुकीची अद्ययावत माहिती तपासूनच प्रवास करावा, असे आवाहन प्रशासनाने केले आहे.