पुणे : देशभरात खळबळ उडवून देणाऱ्या नीट परीक्षा पेपरफुटी प्रकरणाचे धागेदोरे आता पुण्याच्या शैक्षणिक वर्तुळापर्यंत पोहोचले आहेत. या प्रकरणातील अटकेत असलेला मुख्य आरोपी तेजस शाह याचे पुण्यातील अनेक नामांकित महाविद्यालयांतील प्राध्यापकांशी गेल्या अनेक वर्षांपासून जवळचे संबंध असल्याचे वास्तव सीबीआयच्या तपासात समोर आले आहे. या माहितीनंतर केंद्रीय अन्वेषण विभागाने (सीबीआय) आपला तपासाचा फास आवळला असून, पुण्यातील एका प्रतिष्ठित महाविद्यालयातील पाच निवृत्त प्राध्यापक सध्या सीबीआयच्या रडारवर आहेत.
तपासादरम्यान मिळालेल्या माहितीनुसार, तेजस शाह हा केवळ प्राध्यापकांच्या संपर्कातच नव्हता, तर त्याने या माध्यमातून अनेक विद्यार्थ्यांना परीक्षेपूर्वीच प्रश्नपत्रिका आणि उत्तरे पुरवल्याची कबुलीवजा माहिती चौकशीत समोर आली आहे. शाह याचे शहरातील अनेक नामवंत कॉलेजच्या प्राध्यापकांशी दीर्घकाळापासून नीट पेपर संदर्भात लागेबांधे होते. विशेष म्हणजे, यामध्ये केवळ निवृत्त प्राध्यापकच नव्हे, तर पुण्यातील अनेक खासगी महाविद्यालयांतील विद्यमान प्राध्यापकांचाही समावेश असण्याची दाट शक्यता वर्तवण्यात येत आहे. तेजस शाहने पेपर फुटीच्या अनुषंगाने या प्राध्यापकांशी वारंवार संपर्क साधला होता, असेही तपासात निष्पन्न झाले आहे.