कराड : कराडपासून जवळ असलेल्या मुंढे (ता. कराड) येथे ॲड. हणमंतराव जमाले यांच्या घरानजीक असलेल्या शेतात कोंबडी संरक्षणासाठी लावलेल्या वाघरीच्या जाळ्यात अडकलेल्या खवल्या मांजराची वन विभागाच्या पथकाने सुखरूप सुटका केली. त्यानंतर या दुर्मिळ सस्तन प्राण्याला तपासणीअंती सुरक्षित नैसर्गिक अधिवासात सोडण्यात आले.
गुरुवारी रात्री ते शुक्रवारी पहाटेच्या दरम्यान ही घटना घडली. शुक्रवारी सकाळी ॲड. जमाले यांना त्यांच्या शेतातील वाघरीच्या जाळ्यात खवले मांजर अडकल्याचे लक्षात आले. त्यांनी तातडीने वन विभागाला माहिती दिली. त्यानंतर वनपाल आनंद जगताप यांच्या नेतृत्वाखालील पथकाने घटनास्थळी जाऊन पाहणी केली असता, खवले मांजर वाघरीत अडकले असल्याचे दिसले. रात्रभर स्वतःला सोडवण्याचा त्याने प्रयत्न केल्याचेही खुणा आढळल्या.
वन विभागाच्या पथकाने काळजीपूर्वक जाळी कापून खवले मांजराची सुटका केली. पशुवैद्यकीय अधिकाऱ्यांकडून तपासणी केली असता ते मादी असून अंदाजे वय दोन वर्षे आणि वजन ९.१३० किलो असल्याचे निष्पन्न झाले. प्राणी सुस्थितीत असल्याचे प्रमाणित झाल्यानंतर त्याला जंगलातील सुरक्षित ठिकाणी सोडण्यात आले.
खवल्या मांजराचे दर्शन झाल्यास तत्काळ वन विभागाशी संपर्क साधावा, असे आवाहन कराडच्या वनक्षेत्रपाल ललिता पाटील यांनी केले आहे.