पुणे : केतन अग्रवाल हत्या प्रकरणाचा तपास पूर्ण करून पुणे ग्रामीण पोलिसांनी वडगाव मावळ न्यायालयात ५०५३ पानांचे दोषारोपपत्र दाखल केले आहे. सिया प्रविण गोयल, चेतन बाबुलाल चौधरी आणि रितेश संजय हंगे यांच्याविरोधात हे दोषारोपपत्र दाखल करण्यात आले आहे. या प्रकरणात

पोलिसांनी प्रत्यक्ष साक्षीदारांसह डिजिटल आणि तांत्रिक पुरावेही मोठ्या प्रमाणावर संकलित केले आहेत.

दोषारोपपत्रात संशयितांच्या मोबाईल फोनमधील डेटा, व्हॉट्सअॅपवरील संभाषणे, छायाचित्रे, कॉल डिटेल रेकॉर्ड (सीडीआर), तांत्रिक विश्लेषणाचे अहवाल, विविध कागदपत्रे तसेच साक्षीदारांचे जबाब यांचा समावेश आहे. तपासादरम्यान पोलिसांनी ८० हून अधिक साक्षीदारांचे जबाब नोंदविले आहेत. त्यापैकी काही साक्षीदारांनी सिया गोयल आणि चेतन चौधरी यांना गुन्ह्याशी संबंधित हालचाली करताना पाहिल्याचे तपासात समोर आले आहे. काही महत्त्वाच्या साक्षीदारांचे जबाब फौजदारी प्रक्रिया संहितेच्या कलम १६४ अन्वये नोंदविण्यात आले आहेत.

दोषारोपपत्रातील माहितीनुसार, सिया आणि चेतन यांनी मार्च २०२५ मध्ये नव्या सांगवीतील एका तरुणीचा लोहगडावरून पडून झालेला मृत्यू आणि त्यासंबंधीची माहिती इंटरनेटवर शोधल्याचे तपासात समोर आले आहे. याशिवाय देशभरात चर्चेत आलेल्या सोनम रघुवंशी हत्या प्रकरणाचाही त्यांनी सखोल अभ्यास केल्याचे पोलिसांच्या तपासात निष्पन्न झाले आहे. तसेच गुन्हेगारी घटनांशी संबंधित माहिती आणि खुनाच्या घटना दाखविणारे चित्रपट पाहिल्याचेही दोषारोपपत्रात नमूद करण्यात आले आहे.

पोलिसांनी या प्रकरणात डिजिटल पुराव्यांना विशेष महत्त्व दिले आहे. मोबाईलमधील डेटा आणि सीडीआरच्या तपासासोबतच व्हॉट्सअॅप संभाषणे, छायाचित्रे आणि तांत्रिक विश्लेषणाच्या प्रमाणपत्रांचा पुराव्यांमध्ये समावेश करण्यात आला आहे.

रितेश हंगेची 'सल्लागार' भूमिका

अग्रवालच्या हत्येच्या कटात चेतनचा मित्र रितेश हंगे याने महत्त्वाची भूमिका बजावल्याचे पोलिस तपासात समोर आले आहे. केतनचे काय करायचे, त्याचे हात-पाय तोडायचे की अन्य व्यक्तीकडून हत्या करून घ्यायची, यासंदर्भातील चर्चेत हंगे सहभागी होता. गुन्ह्यानंतर पोलिसांच्या कारवाईपासून कसे वाचायचे, घटनास्थळी सीसीटीव्ही नसावे तसेच मोबाईलचा वापर कसा टाळावा, यासंदर्भातही हंगेने चेतन आणि सियाला मार्गदर्शन केल्याचे दोषारोपपत्रात नमूद करण्यात आले आहे.

हत्येसाठी लोणावळ्यात विविध ठिकाणांची पाहणी

केतनची हत्या करण्यासाठी आरोपींनी लोणावळ्यातील विविध ठिकाणांची पाहणी केली होती. २१ मे रोजी टायगर पॉईंट, उंच ठिकाणे आणि दऱ्यांची पाहणी करण्यात आली. त्यानंतर ३१ मे रोजी सिया चेतनला लोहगडावर घेऊन गेली. याच वेळी केतनला नेमक्या कोणत्या ठिकाणाहून ढकलून द्यायचे, याची जागा निश्चित करण्यात आल्याचे पोलिस तपासात समोर आले आहे.

(संबंधित इंग्रजी बातमी वाचण्यासाठी येथे क्लिक करा.)