सांवतवाडी : कोकण रेल्वे प्रवाशांसाठी आनंदाची बातमी असून सावंतवाडी रोड रेल्वे स्थानकावर राजधानी एक्स्प्रेससह तीन महत्त्वाच्या एक्स्प्रेस गाड्यांना व्यावसायिक थांबा देण्यास केंद्रीय रेल्वे मंत्रालयाने मंजुरी दिली आहे.
मुख्यमंत्री देवेंद्र फडणवीस यांच्या पाठपुराव्यानंतर केंद्रीय रेल्वेमंत्री अश्विनी वैष्णव यांनी या प्रस्तावाला मंजुरी दिली. या निर्णयामुळे आगामी गणेशोत्सवासाठी कोकणात येणाऱ्या चाकरमान्यांना मोठा दिलासा मिळणार आहे.
मंजुरी मिळालेल्या गाड्यांमध्ये सीएसएमटी-मंगळुरू एक्स्प्रेस, तिरुवनंतपुरम-हजरत निजामुद्दीन राजधानी एक्स्प्रेस आणि लोकमान्य टिळक टर्मिनस-कोचुवेली गरीब रथ एक्स्प्रेस यांचा समावेश आहे.
कोरोना काळात राजधानी आणि गरीब रथ एक्स्प्रेसचे सावंतवाडी रोड स्थानकावरील थांबे बंद करण्यात आले होते. रेल्वे प्रवासी संघटनेचे विनोद नाईक-राणे यांनी आमदार सुलभा गायकवाड यांच्या माध्यमातून मुख्यमंत्री देवेंद्र फडणवीस यांच्याकडे मागणी केली होती.