कुडाळ : कुडाळ तालुक्यातील पिंगुळी येथील तलावात शिरलेल्या मगरीला वनविभागाच्या जलद बचाव पथकाने (RRT) आणि कर्मचाऱ्यांनी दोन दिवसांच्या अथक प्रयत्नांनंतर सुखरूप जेरबंद केले. पशुवैद्यकीय तपासणीनंतर मगरीला कोणतीही इजा झाली नसल्याचे स्पष्ट झाल्याने तिला तिच्या नैसर्गिक अधिवासात सुरक्षितपणे सोडण्यात आले.
तलावात मगर असल्याची माहिती ग्रामस्थांनी वनविभागाला दिली. त्यानंतर वनविभागाचे पथक तातडीने घटनास्थळी दाखल झाले. तलाव खोल असून मोठ्या प्रमाणात पाणी व गाळ असल्याने मगरीला पकडणे आव्हानात्मक ठरले. मड पंपच्या साहाय्याने तलावातील पाणी कमी करण्यात आले. जवळपास पाच ते सहा तासांच्या प्रयत्नांनंतर वनविभागाच्या कर्मचाऱ्यांना आणि RRT पथकाला मगरीला पकडण्यात यश आले. उपवनसंरक्षक मिलिंद शर्मा आणि सहाय्यक वनसंरक्षक सुनील लाड यांच्या मार्गदर्शनाखाली ही मोहीम राबविण्यात आली.