जळगाव : गुजरातमधील अहमदाबाद येथून चोरीस गेलेली सुमारे ९ लाख रुपये किमतीची कार जळगाव पोलिसांनी थरारक पाठलाग करून जप्त केली. एमआयडीसी पोलिसांनी कारचालकाला ताब्यात घेतल्यानंतर आवश्यक कायदेशीर प्रक्रिया पूर्ण करून ही कार गुजरात पोलिसांच्या स्वाधीन करण्यात आली.
अहमदाबाद ग्रामीण हद्दीतील बोपल पोलीस ठाण्याच्या कार्यक्षेत्रातून १५ एप्रिल रोजी ही कार चोरीला गेली होती. याप्रकरणी तेथे गुन्हा दाखल करण्यात आला होता. दरम्यान, १८ जून रोजी सायंकाळी ही चोरीची कार जळगावच्या दिशेने येत असल्याची माहिती पोलिसांना मिळाली. त्यानुसार वाहतूक शाखेच्या पथकाने काशिनाथ चौक येथे नाकाबंदी केली.
पोलिसांनी वाहन थांबविण्याचा इशारा दिल्यानंतरही चालकाने कार न थांबवता ती भरधाव वेगाने अजिंठा चौफुलीकडे पळवली. पोलिसांनी तत्काळ पाठलाग करून अजिंठा चौफुली येथे कार अडवली आणि चालकाला ताब्यात घेतले.