महाराष्ट्रातील वाशिम येथे रविवारी (दि.२६) पहाटे भीषण आग लागून चार दुकाने जळून खाक झाली. काही मिनिटांतच आगीने रौद्ररूप धारण केल्याने परिसरात एकच खळबळ उडाली. घटनेची माहिती मिळताच पोलीस, अग्निशमन दल आणि स्थानिक नागरिकांनी घटनास्थळी धाव घेत आग आटोक्यात आणण्यासाठी शर्थीचे प्रयत्न केले.
काही मिनिटांत चार दुकाने आगीच्या भक्ष्यस्थानी
सोशल मीडियावर व्हायरल झालेल्या व्हिडिओमध्ये चारही दुकाने आगीच्या भक्ष्यस्थानी पडल्याचे दिसत आहे. आगीमुळे धुराचे मोठे लोट आकाशात पसरले होते. स्थानिक नागरिक, पोलीस आणि अग्निशमन दलाच्या जवानांनी संयुक्तपणे आग विझविण्याचे प्रयत्न केले. अग्निशमन दलाने क्रेनच्या मदतीने दुकानांचे शटर उघडून आतून आग नियंत्रणात आणण्याचा प्रयत्न केला.
सुदैवाने या घटनेत कोणतीही जीवितहानी किंवा दुखापत झाल्याची माहिती समोर आलेली नाही. मात्र, चारही दुकानांचे मोठे आर्थिक नुकसान झाल्याचा अंदाज व्यक्त केला जात आहे. आग लागण्याचे नेमके कारण अद्याप स्पष्ट झाले नसून, संबंधित यंत्रणा याबाबत तपास करत आहेत.
अंधेरीतही लागली होती भीषण आग
दरम्यान, शनिवारी (२५ जुलै) मुंबईतील अंधेरी पश्चिम येथेही अशाच प्रकारची आग लागल्याची घटना घडली होती. एस. व्ही. रोडवरील बोनी प्लाझा शॉपिंग मॉलमध्ये भीषण आग लागल्याने परिसरात काही काळ घबराट पसरली होती. आगीत मॉलमधील अनेक दुकाने आणि गाळ्यांचे नुकसान झाल्याची प्राथमिक माहिती समोर आली होती.
घटनेनंतर मुंबई अग्निशमन दलाच्या चार गाड्या तातडीने घटनास्थळी दाखल झाल्या होत्या. अनेक तासांच्या प्रयत्नांनंतर आग नियंत्रणात आणण्यात आली. या आगीत कोणतीही जीवितहानी झाल्याची अधिकृत माहिती समोर आली नव्हती. आग लागण्याचे कारण अद्याप स्पष्ट झालेले नसून, संबंधित यंत्रणांकडून तपास सुरू आहे.
अल्पावधीत राज्यातील दोन वेगवेगळ्या भागांत व्यावसायिक आस्थापनांना आग लागल्याच्या घटनांमुळे अग्निसुरक्षेचा मुद्दा पुन्हा चर्चेत आला आहे.